Ka sorkar jylla da pynsñiaw ko ha ka sorkar pyrdi wow chimkhia yei dooh næ ka bai lutsan yong ki tre thaw wa haap cha baar i kær naar-chieh ha khappood India-Bangladesh, deiwa chim wa ini i kaam man i i hok neibhah wa ktah ko yei ja-kpoh kiwa chong chnong kitæ ki thaw.
U Symbood Montri Rangbah uwa pait ya ki kaam Pohyung ka jylla, u Prestone Tynsong da ong u wa ki thaw khappood ki wym pu kær naar-chieh hapyrdi ka India-Bangladesh dang em ki sa kamwa 50 Km.
Da pyntip wa ka sorkar da pyrchang ko katwa ye wow pyntikna wa i kær sainar noh ha kini ki 50 Km tam. Tangwa da maad ya ki kattu katni i eh neibhah wa ki tre thaw wa ki waheh chnong da pyrchah ki ya u pood wow kær sainar deiwa pynsñiaw wa kiwa boon ki thaw rep da chah pynhaap noh charood (No Man’s Land).
Da pyntip u wa ki kattu katni na ki tre thaw wa ki waheh chnong da pynsñiaw ki wa lada ki thaw yong ki haap ki charood, ka sorkar India hap su ko ya ka bai thaw khamtam kiwa haap cha baar i kær naar-chieh.
U Prestone da ong u wa kani ka mat toh ka mat wa sñiaw yahaap, deiwa pynrap wa neiliang ka sorkar jylla da yaklam ko wa ka Ministry of Home Affairs wow pynsñiawthooh ya ka sorkar India wow su ya ka bai thaw cha ki tre thaw wa chah ktah hadien wa kær naar-chieh deiwa pynrap wa ka bai thaw toh du neibynta kiwa haap ki thaw cha lait i kær ha khappood.
Discussion about this post