Ka Mawlai SC da booh ko yei thaw yong ka ha ka Pre-Quarterfinal ka 5th Meghalaya State League deiwa jop ya ka Lamin XI SCC da 2-1 ha Group C kawa da pynman ha Amlarem ynne.
Ka Mawlia da pynyalehke ko da ki Junior Player kamwa leh heipor wa yalehke pyrchah ya ka Laskein SCSC ha ka 28 tarik u April hadien wa kiwa boon kiwa yalehke ko da lai chimbynta ki ha ka I-League 3, tangwa kiwa yalehke ko da ye ki wow pynyoh yei jop deiwa thap u Syndongmiki Lyngdoh (9′) wa u Livingson Lyngdoh (77′) katwa ya ka Lamin da thap da u Genial Lamin ha minit wa 63.
Ha ka yalehke ha Shillong, ka Nangkiew Irat SC da pyntikna ko wow yoh nyngkong ha ka Group B deiwa jop 6-1 ya ka Mawphu SC. U Jefferson Pakyntein (16′, 32′, 57′) da yoh Hat-Trick u deiwa thaplang u Dibinroy Nongspung (4′), u Ronaldkydon L Nonglait (44′) wa u Nikelson Bina (83’P). U Banman Roy Nongsiej (54′) da thap u ya ka Mawphu.
Ha ka Group E, ka Lumphyrnai Sohphoh FC leh da yoh ko wow psiah Pre-Quarter hadien wa pynrem ko ya ka Lamyrsiang SCC da 3-1 ha Wahiajer.
U Eborki Marsharing (14′) da thap nyngkong u ya ka Lamyrsiang tangwa ka Lumphrynai Sohphoh da wan ko wow thap le sien ha ka kylla miet lyngba u Phrangsngi Law (52′) wa u Sonowel Kharsati (79′, 81′). Hanla da em ki yalehke wa dang sah ha kani ka Group, ka Shillong Lajong FC wa ka Lumphrynai Sohphoh toh kiwa da yoh wow psiah Pre-Quarter.
Ha ka Group D, ka Ladthadlaboh SC hei khaddooh da yoh ko yei jop wa nyngkong deiwa pynrem ya ka Jalaphet Moochut Pyrdung SC da 10-1 ha Khliehriat. Waroh kini ki ar liang toh ki wym pu em jop hadooh ynne ka sngi wei ym em laad de ki leh wow poi cha ka Round of 16.
Ya ka Ladthadlaboh da thap da u Sandeep Siangshai (7′, 16′), u Andrew Nanghuloo (10′, 49′, 51′), u Shanhok Siangshai (14′, 22′, 24′) wa u Wansa-oo Latoo (70′, 79′), katwa u Tiyo Syrti (53′) da thap u ya ka Jalaphet.
Ha ka Group F ha Mairang, ka Mishon SSCC da jop ko ya ka Umlakro SC da 3-0 kiwa thap da u F. Damanbhalang Ryntathiang (35′, 67′) wa u Mebanlambeit War (53′).
Ha ka Group G ha Williamnagar, ym em wa thap hapyrdi ka Janepih YSCA wa ka Maram FC, ha Mawkyrwat leh i jooh hapyrdi ka Mawlarshong SC wa Mawten SC kawa man ka yalehke Group H.
Ha ka 4 tarik daw em ar tylli donhi ki yalehke kiwa daw sdang heipor 3:00PM, kitæ ha Group E hapyrdi ka Iatyllilang Lumsehkot CSC wa ka Lumphyrnai Sohphoh FC ha Wahiajer wei ha Group G won ka Balmanduri FC daw yachem ko wa ka Attong Matgrik FC ha Williamnagar.
Discussion about this post