Nei yoh yarap yow sdang Homestay chei man kam ka Resort deiwa yoh Scheme sorkar

Ha ka yalang wow pynkup burom ya kitu kiwa da jop wei man khih man khan ha ki kaam Tourism wa da pynman ha Orchid Lake, Umiam ynnin ka sngi. Neiliang u Montri Rangbah ka jylla, u Conrad K Sangma da ong u wa ki kaam uiñke suwari ym man ko kawa jop du dei bor sorkar wei da emkaam yei ya krehlang nadooh ki tre Hotel, kiwa kamai kari, ki thaw baam wa kiwi de wei kattæ da ye wow em iwa ye wow pynbiang ya iwa boon iwa emkaam.

Da ong u leh wa hawa ka yung ka sem pyrkhat ko cheiwon u lai ke, toh u pyrkhat nyngkong ki ya ka Meghalaya.

Da khana u leh ya ki kreh kiwa dang lai chakhmat kattæ kam ka Shillong Ropeway, ka Mawkdok Skywalk, ka Rain Museum ha Mawsynram, ka Living Root Bridge Museum wa ki Tourism Centre ha Sohra, Mandalgre wa Siju wei kamjooh i chna pynheh ya ka Shillong Airport kawa da booh por wow pyndep hapoh 15 bnai.

Neiliang u Tourism Minister, u Timothy D. Shira da ong u wa ha u snem 2025 da jan dap 18 lak ngut kiwa uiñke suwari kiwa wan yooh kjat ha Meghalaya. Wei kattæ da em palat 150 tylli ki Tourism Project kiwa da pynkreh ha kylleiñ ka jylla kiwa chongdor da ki hajar klur.

Ha kani ka sngi da pynbna leh ya kiwa yoh myntoi thymme hapoh ka Chief Minister’s Meghalaya Homestay Mission wei da pynkup burom leh ya kiwa da pynkrehkaam bha ya ka Chief Minister’s Homestay Scheme-PMEGP.

Kani toh kawa da sdang ha u September 2025, wei ka thong toh yow sdang 3,000 tylli ki Homestay thymme kat ha u 2028 deiwa pynyoh kreh palat 15,000 ngut ki bru hapoh waroh kawi ka jylla. Hadooh kattæ da em 80 tylli ki Homestay Application kiwa da yoh yei mynjur heiwa 55 tylli toh kiwa na ka thaaiñ Khasi, Jaintia wa Ri-Bhoi wei ka poisa wa da pynlait dapoi ko ₹3.85 klur.

Da saam leh ki Sanction Letter hapoh ka Community-Led Infrastructure Scheme heiwa 20 tylli ki Project toh kiwa dadep pynkreh wei da pynbna yei pyrtuid ki 58 ngut kiwa thymme na thaaiñ Khasi, Jaiñtia wa Ri-Bhoi kiwa da yoh myntoi wei ka poisa dapoi ko hadooh ₹3.40 klur.

Related posts

Hap pynman Election neidaw wa em 2 ngut kiwa kwah man Syiem Sohra: EC

May 7, 2026

Chit i yaklam hadien wym bien ka KHADC wow e ya ka Sanad Syiem Sohra

May 7, 2026

Da pynbna leh yei pynbha pynmiat ya kiwa boon ki thaw uiñke suwari wa em hapoh ka jylla deiwa booh ki paikhana wa kiwi de neibynta ki 84 tylli ki thaw wei hapoh ka State Scheme da em 17 tylli ki thaw kiwa da yoh ya ki paikhana kiwa man katkam ka juk wa katni kam ha Living Root Bridge, Ward’s Lake, Laitlum Canyon, Mawphanlur, Umiam Lake Viewpoint, Krang Suri Falls, Wari Chora wa Siju wei kini da chongdor ki ₹3.44 klur.

Da saam leh ya ka Scholarship cha kiwa lai puræ ha ka Institute of Hotel Management Shillong kam chibynta ka Chief Minister’s Meghalaya Hospitality Scholarship Scheme. Wei hadooh kattæ da em 21 ngut kiwa da yoh ya ka Full Course Fee Scholarship wa chongdor ₹3.67 lak samen, katwa 37 ngut da yoh ki ya ka Annual Stipend kawa ₹32,000 hapoh ka Reserved Category yong u snem 2023–24 hadooh u 2025–26.

Ha kani ka yalang da yoh leh yei klam na u Daminot Kharchandi uwa da yoh myntoi na ka Chief Minister’s Homestay Scheme-PMEGP heiwa da khana u deiwa yarap ka sorkar da sñiaw skem u wow sdang khih neibhah ym jooh tip u iyi iyi chaphang kammon wow sdang khih. Yow sdang da chim u ya ka Rs. 10 lak kawa da tyrwa ka sorkar.

Da ong u wa nyngkong da sdang u da ka Homestay wa khian kawa katni da man ko kam ka Mukhan Resort wa em ha Ri-Bhoi, wei da em leh ka thong wow pynheh chooh chooh ka.