Dadep thooh ya palat 50,000 ngut kiwa yalehke ka Meghalaya neibynta ka National Games 2027

Kam chibynta wow pynkhreh ya ka 39th National Games 2027 kawa daw pynman ha Meghalaya, da pynman yei yachem u Sports Minister, u Wailadmiki Shylla wa kiwa yalehke deilang ki Coach wa ki Sports Association yow yaklam ya kiwa boon jait nadooh i pynkhreh wa i e kyrchaan ka sorkar.

Neiliang u Wailadmiki da ong u wa emkaam wow ya krehlang da waroh yow pynman ya ka National Games kawa jop.

Da khana u wa da khut pynman ya kani ka yalang hadien wa em uwi uwa yalehke uwa da kdaw wa du wow pynbiang ya ki thaw yalehke, ki thaw sikai ym pu biang i yow pyntikna u jop Medal tangwa da emkaam leh wot i baam wa tei yei doh i pran.

Kamtæ da e ya kani ka rynsan yow e laad ya kiwa yalehke yow pynsñiaw ki yeiwa kwah ki.

Related posts

Sbak khang ki pulit ya ka luti wow lai cha Secretariat | Sahkut kiwa yakhih pyrchah Shree Cement

May 18, 2026

Da yang chwa ki pulit ya kiwa wan toor cha Secretariat yow pyrchah Shree Cement  

May 18, 2026

U Wailad da kdaw u leh wa da emkaam ki Policy neibynta ki khynroo neibhah 59% kiwa chong chnong ka Meghalaya toh kiwa em hapoh 25 snem i rta.

Neibynta ka mang tangka ka Sports Department kawa jooh man Rs. 40 klur donhi ynñiaw snem nachwa, da pynku cha Rs. 844 klur yow ye u chna yeiwa emkaam kamjooh ki thaw e sikai.

Wei neibynta ka National Games, da e bor leh ha ki Sports Associations yow pynkhreh ki heiwa kam chibynta ka 1^st Phase dadep wow thied ya ki tiar ki tar wei da pynemkaam da ki National wa International Coach yow e sikai.

Da e khublei u leh ya kiwa yalehke ka Meghalaya kiwa da lehbha ha ka Khelo India Tribal Games, heiwa da ku ka Ranking ki na 29 cha 13 deiwa ong leh wa ini pynyoo ko yeiwa krehkaam iwa da sdang ka sorkar.

Da pynbna u leh wa ka sorkar daw pynlait ko sa ka poisa ka 2^nd Phase yow yarap ya kiwa yalehke nadooh i thaw sah, i baam wa yow phah lai chimbynta ki ha kiwa boon ki yakob hapoh ka ri.

Yow e mynsien ya kiwa yalehke, da pynkynmoo u ya ka Meghalaya Outstanding Direct Appointment Policy heiwa kiwa yoh Medal ha ki National Games ye ki wow yoh kreh sorkar. Wei ye ki leh wow pteiñ yei puræ puthi deilang i yalehke chwa wow psiah ki hei kreh sorkar heir ta wa 37 snem.

Nadooh u June 2025 da em palat 50,000 ngut kiwa yalehke kiwa dadep lai thooh na kylleiñ ka jylla heiwa kattæ da em palat 1,200 ngut kiwa dang leh Training hapoh ki 27 tylli ki State Sports Association.

Kiwa yalehke ka Meghalaya da yoh ki 70 tylli ki Medal ha ki yalehke National wa International wa kynthup ya 23 tylli ki Gold Medal. Da chna leh ya ka High Performance Sports Science Centre ha J.N. Sports Complex, da pynlut leh Rs. 1,800 klur yow chna ya ki Sports Infrastructure nadooh u snem 2018.