Ka Rymbai Shkenshynriah SC deilang ka Langsning FC da yoh ki wow psiah Semi Final na ka Group B ka 5th Meghalaya State League hadien wa kut ki yalehke ka Quarter Final League Stage kiwa da pynman ha SSA Stadium ynne ha Shillong.
Na Group A kiwa da psiah Semi Final toh ka Nongkseh SSCC wa ka Shillong Lajong FC heiwa ki Semi daw pynman ha ka 29 wa 30 tarik u May. Ka Final won daw pynman ha ka 4 tarik u June.
Ka Shkenshynriah ynne da jop ko da 5-2 ya ka Nangkiew Irat SC heiwa waroh ki kool toh kiwa da thap ha ka kylla miet.
U Iaishah Bareh (56′), u Hesmiki Rymbai (69′, 90’+3), u Niponghi Sumer (77′) wa u Harita Suchen (90’+4) da thap ki ya ka Shkenshynriah katwa u Brolington Warlarpih (58′) wa u Justerwell Tham (81′) da thap ki ya ka Nangkiew.
Ka Langsning da jo ko da 2-0 ya ka Maram FC da ki kool wa thap u Donlad Diengdoh (41′) wa u Nelson Rymbai (48′).
Ki yalehke Semi Final toh kiwa daw sdang heipor 6 PM ha waroh ki ar sngi heiwa ka Nongkseh daw yachem ko wa ka Rymbai Shkenshynriah ha ka 29 tarik katwa ka Langsning daw yachem ko wa ka Lajong ha ka sngi wa bood.
Discussion about this post