Ka Election cha ka Rajya Sabha Seat kawa em du kawi donhi na Meghalaya u pynman ka ha ka 18 tarik u June 2026 wei neiliang ka chnat Election ka jylla da man ko kawa da pynkhreh wow pyndep yeini waroh.
Neiliang u Chief Electoral Officer (CEO) ka jylla, u Dr. BDR Tiwari da pyntip u wa da hap wow pynman ya ka Election neidaw wa ka samoi u MP ka Rajya Sabha u kut noh ko ha ka 21 tarik u June 2026.
Da pyntip u leh wa ka Election Commission of India da pynmih ko yei pynbna wa ka 8 tarik u June u man ko ka sngi wa khaddooh wow thap yei pyrtuid kyrtong heiwa i pait ya ki kot ki sla u pynman ha ka sngi wa bood ka 9 tarik, wei ki kyrtong ye ki wow kynrandien ha ka 11 tarik.
Ya ka sngi thap Vote ha ka 18 tarik u pynman nadooh 9:00 waje i step hadooh 4:00 waje i janmiet, katwa ya ka Vote u niaw nadooh 5:00 waje i janmiet ha ka jooh ka sngi wei waroh ki kaam Election toh u pyndep chwa ka 20 tarik u June.
Chwa ini dadep leh u lai pait yei pynkhreh deiwa emlang kiwa mihkhmat ka Meghalaya Legislative Assembly deiwa lai leh cha ka thaw thap Vote heiwa da chem wa man ko kawa biang deiwa bood ya ki kyndon ka Election Commission.
U CEO da khana u leh wa dadep wow batai cha ki seiñ saiñhima wa yei rukom thap Vote katkam ki kyndon ka Representation of the People Act, 1951.
I thap Vote u man ko da ki MLA na ki Political Party kiwa hap wow pynyoo ya ki ‘Marked Ballot Papers’ cha ki Agent wa da yoh bor na ki jar jiar ki Party, tangwa ki Independent MLA ym chah wow pynyoo ya ka Ballot Paper cha kiwon kiwon ki Agent.
Heiyatoh won wa ka Special Intensive Revision (SIR) yong ki Electoral Roll, u Tiwari da ong u wa ka chnat Election toh kawa da pynkhreh wei ki Booth Level Officers kattæ dang yoh ki ya Training yow psiah cha kawi pa kawi ka yung.
Discussion about this post