U Montri Rangbah ka jylla, u Conrad K Sangma da pdiang u wa toh iwa eh khlem em i khia chiliang heiyatoh wa i tih mooyong khamtam yow tih dei Scientific Mining.
Hawa klam ynne ka sngi, da ong u wa sorkar hap ko wow pynbiang ya chiliang neibynta i chngaaiñ kiwa tih mooyong wei ha chiliang won wow pyrkhat yei chah ktah ka mariang, wei da pynrap u wa hawa leh yeini i kaam daw em bait i eh wei ym ye wow leh deiwa suk.
Da ong u wa ka sorkar jylla krehlang ko wa waroh hajrong ini i kaam wei kamjooh wa ka sorkar India, heiwa da pynsñiaw u yei kyrmen wa suki suki daw ye wow pynbiang khlem da leh chiliang næ khia chiliang ka pyrla.
Chooh chooh da ong u wa kamwa man kattæ ka sorkar India da e bor ko ya ka Scientific Mining du ya kitu kiwa em thaw wa heh hadooh 100 Hectare, heiwa da khana u wa da em 4 tylli ki thaw tih mooyong kiwa da yoh bor heiwa 3 tylli da sdang ki wow tih mooyong wei chiboon bah u mooyong wa dadep tih da ka Scientific Mining wei da chalan leh cha baar ka jylla.
U Conrad da ong u wa i sñiawkhia yong ka sorkar toh ya kiwa khih mooyong kiwa khian ki wym em yei thaw katkam wa da phah, tangwa neibynta ini ka sorkar dang yaklam ko wow yohbor na ka sorkar India wa kiwa em thaw da iwa rap khian leh u yoh ki yei mynjur yow tih mooyong.
Heiyatoh wa ki krem mooyong kiwa da ieh chrah heiwa dang dep wot wa em uwi uwa haap chapoh hadooh wa yap, neiliang u Montri Rangbah da ong u wa man iwa eh wow lai pait ya kini ki paar mooyong neibhah du ha kawi ka District em hadooh kamwa 21,000 tylli wei ha ka jylla waroh kawi ym duna ya ka 25,000 tylli ki paar mooyong kiwa ha jar jiar i thaw wei ym ye wow man wa ye u lai pait lut ya kini ki krem mooyong khamtam wa kini ki paar mooyong toh kiwa da em da palat spah snem.
Discussion about this post