Ka Pnar Student Movement (PSM) Central Body deilang kiwa yahkhmat ka PSM Khliehriat Circle, ynnin ka sngi da lai e mynsien ki ya u Marshall Biam uwa man kam u President ka Jaiñtia Coal Owner Miner Suppliers & Workers Association (JCOMSWA) uwa da chong chah thngan khlem da booh por yow dawa wai yei kaam tih mooyong iwa man i kaam yap kaam im wa i yoh i kot hapoh Jaiñtia Hills waroh kawi nadooh wa chah khang u tih mooyong ha u snem 2014.
Neiliang ka PSM da pynsñiaw ko wa ha ki por nachwa hachwa u 2014, ka yaaw ka haat, ka khih ka khan, ka kamai kajih da man ko kawa biang tangwa manda dooh khih mooyong, ki bru da maad ki yei eh wa boonjait heiwa da hiar lut i yoh i kot nadong chadong iwa da ktah leh yei phah lai skur ya ki khon ki kti.
Ka seiñ da kyrpaad ko ya kiwa chong chnong yong ka Jaiñtia Hills waroh, ki seiñbhalang wei kamjooh ya kiwa mihkhmat na ri-loom Jaiñtia nadooh ki MDC wa ki MLA waroh wow wan e mynsien ki ya u Marshall Biam khnang wow nang yohbor chooh chooh u ha kani ka kaam dawa wai biang yei kaam tih mooyong wei khayi mooyong.
Kamjooh ka seiñ da booh ko yei kyrpaad ya ka sorkar MDA-II hapoh i yahkhmat u Conrad Sangma kam u Chief Minister, u Sniawbhalang Dhar wa u Prestone Tynsong kam ki Deputy CM yow thooh ki laad ki luti kammon wow wai biang yei kaam tih mooyong kam ki por wa nachwa deiwa yaklam wa ki bor wa em ha khlieh khnang u yoh laad ki paidbah u ya khihlang.
Ka seiñ da ong ko wa ki kyndon wa booh ka sorkar yow pynkreh ya u mooyong ym yahaap ko u cha ki thaw yong i neidaw wa man loom ymtoh kam cha kiwi ki thaw wa man madan.
Da kyrpaad leh ya ka sorkar wow smat ko u chimkhia ya ini i kaam khnang wa u President ka JCOMSWA, u Marshall Biam uwa chong chah thngan yow lait u chah ktah i chait i khiah yong oo.
Discussion about this post