Ha iwi i jia wa sñiawsih ha Nongpoh ynnne i step ka 13 tarik, uwi u khynroo da khlaad noh u katwa uwi won da mynsoo joor u hadien wa i saad (Concrete Slab) yong iwi i yung wa dang tympra da haap syndet i hajrong kini kiwa kreh mylla.
Katkam ka khubor wa da yoh, ki soo ngut ki khynroo kiwa na ka chnong Umpathaw, Ri-Bhoi District dang kreh ki yow tympra yei chram kani ka yung Building kawa man ka yong u Ngaitlang Dhar kawa dang dep thied u na kiwi wei da man ko ka Building kawa da chah ieh khlem pyndep chna wei manda sdang wow kreh ka kattæ da jia noh ini iwa sñiawsih.
Kani ka Building toh kawa em hapyrdi ka chnong Nongpoh.
Ha ini i jia, u Jelin Mangu uwa dang 20 snem i rta da khlaad noh u pyn ha ini i thaw wa jia, katwa u Solar Lymphuid (19 snem) da mynsoo joor u. Ki paidbah kiwa em chajan mar ya tip ki yeini wa jia da phet smat ki yow e yarap wei da ye wow sai nyngkong ya uwa mynsoo wei da pynkit noh wut-wut cha Nongpoh Civil Hospital.
Hadien kattu katni por da ye wow sai ya u Jelin Mangu uwa da sahkut hapoh ki bynta yong katai ka Building tangwa da chem wa da khlaad noh u. Ki ar ngut won kiwa lait nei mynsoo toh u Nalor Myrsing (19 snem) wa u Turbor Damlong (22 snem) wei waroh soo ngut toh kiwa na ka chnong Umpathaw.
Hadien ini wa jia, ki pulit dapoi smat ki cha kani ka thaw wei da pynkit yei metyap uwa khlaad cha Nongpoh Civil Hospital yow pyndep yeiwa emkaam katkam ka aiñ.
Ki pulit dang pynman ki yei takit yow chem yei daw wa jia ini.
Discussion about this post