Ka Jaiñtia Students’ Movement (JSM), Central Executive Committee, ynnin ka sngi da e dorkhat ko ha u Chief Executive Member (CEM) ka Jaiñtia Hills Autonomous District Council (JHADC) wow dawa na ka Council yow pynmih ya ka aiñ wa tip kam ka “Jaiñtia Hills Autonomous District (Registration & Protection of Clans) Act, 2026”.
Ya ka dorkhat da e ha u CEM hadien ka Resolution wa da mynjur da ka dorbar bah yong ka “Dorbar Ki Waheh Kur Ri Jaiñtia” kawa da pynman ha ka 13 tarik uni u bnai ha Chiliangraij, Jowai heiwa ki Waheh Kur na kylleiñ ka Ri Jaiñtia da dawalang ki da i jooh wow em noh da ka aiñ wow yada ya ki Kur (wa chim jait na ka bei) kiwa em ha Ri Jaiñtia.
Ki mat wa kongsan wa da pysñiaw da ka seiñ JSM ha ka dorkhat kynthup ki ya ka aiñ ka JHADC katkam ka Article 244 (2) wa Paragraph 3(1)(b) yong ka Sixth Schedule yong ka riti synchaar ka Ri India wa ka JHADC em ko ya i bor wow chna aiñ hajrong i rap pateiñ namo ka “Inheritance” wa i rukom im wa kyrpang “Social Custom”. Ha ka dorkhat da klam leh heiyatoh wa ki pyrtuid ki kur, i tipmit ya i yatoh kur, i bor yong ki Dorbar Kur wa i yada yei rap pateiñ.
Da kdaw leh yeiwa maad ki Kur ha Jaiñtia heiwa da ong wa i wym em ka aiñ wow yada ya i rap pateiñ hadooh wa katni da em boon i kynaad hapoh ki Kur, i yatoh ki kur hapyrdi ki kur ka Bei wow Pa wa dang sdang tlot ki neidaw wym em hei thoh i tar kamjooh ki Dorbar Kur ympu yoh ki ya ka bor aiñ wa pura wow leh yeiwa bha tam pyrchah ya kiwa tyngkheiñ ya ki dustur riti wa ka rukom mantre ki kur.
Chooh chooh ka seiñ da dawa ko ka na ka Council wow pynmih noh ya ka aiñ “Jaintia Hills Autonomous District (Registration & Protection of Clans) Act, 2026” hapoh ka Paragraph 3(1)(b) yong ka Sixth Schedule, u tyrwa aiñ namo ka Draft Bill ha ka Session wow wan yong ka JHADC wei wow pynman da ka phyllu paidbah wa ki Waheh Kur wa kiwi kiwi ki chnat tynre hawa pynkhreh ya ka Draft Bill.
Neiliang u President ka JSM, u Leningstar Rymbai, da ong u wa lada ym em ka aiñ wa skem, i mantre yong i daw wiar ki wei i yada ya ki Kur toh i yada ya ka baitbru.
U General Secretary ka seiñ, u Roitre Dkhar, da ong u wa ini ymtoh i kitkhlieh yong ki waheh wa chemphang tangwa man i leh i kaamram yong ki khynroo wow pynneh pynsah ya ka riti dustur.
Ka JSM da kyrpaad ko leh ya waroh ki Waheh Kur, Waheh Chnong wa ya ki paidbah ka Ri Jaiñtia wow krehlang wow kyrchaan ya ini i dawa yong ka Dorbar Ki Waheh Kur Ri Jaiñtia.
Discussion about this post