U Deputy Chief Minister ka jylla, u Prestone Tynsong da ong u wa ki aiñ kiwa pait yei tih ya ki mar pohkhyndaw toh ki aiñ ka sorkar pyrdi wei ym ye wow pynkylla ki deiwa dawa næ deiwa phah kot phah chithi cha ka sorkar pyrdi.
U Prestone da ong u leh wa em kiwa sñiawthooh bakla wa em ki kyndon ka Mines and Minerals (Development and Regulation) Act, 1957 (MMDR Act) ki wym em krehkaam ha Meghalaya neidaw wa em ko hapoh ka Sixth Schedule.
Da pynche u leh wa ka sorkar da leh ko katwa ye i bor yong ka heiyatoh wa ka aiñ MMDR Act kawa em hei pait i pynkrehkaam da ka sorkar pyrdi wei hap wow bood ka katkam wa man ka aiñ.
Chooh chooh da ong u wa ki License wa da e neibynta wow leh ya ka Scientific Coal Mining toh kiwa da e cha ki seiñ man ko bru samen wei ymtoh cha ka sorkar jylla. Kamtæ da man i bahkhlieh kitu kiwa yoh License wow bood ya ki kyndon ka aiñ.
Da pyntip u leh wa ka sorkar jylla daw pynman ko yei pynsñiawthooh wa bniah ha ka 22 tarik uni u bnai deiwa khutlang ya waroh ki seiñ khih mooyong heiwa daw em leh ki bru wa chemphang heiyatoh wa i rukom krehkaam ka aiñ heiyatoh wa i tih mooyong hapoh ka jylla.
Discussion about this post