Ka JHADC ynne da chong ko ya ka Dorbar Kyrpang namo ka Special Session heiwa da pdiang ko ya ka Resolution wow tyrwa cha ka President ka ri wow pynkylla ya ka aiñ Mines and Minerals (Development and Regulation) Act, 1957 neitæ ka The Mineral Concession Rules, 1960, wa ka The Coal Mines (Special Provisions) Act, 2015 yow yoh biang u tih mooyong ha Jaiñtia Hills.
Hawa wanrah ya ka Resolution da u CEM ka Council, u Thombor Shiwat da kdaw u wa katkam ka Paragraph 12A(b) yong ka Sixth Schedule ka Constitution ka ri, ka President ka India em ko i bor wow pynlait ya ki aiñ ka Parliament nei krehkaam ki ha ki Autonomous District ka Meghalaya, næ wow wanrah da kiwi katkam wa yoobiang ka President.
Da ong u wa ka Supreme Court ha ka mukotduma State of Meghalaya Versus All Dimasa Students Union, Dima-Hasao District Committee, ha ka 3 tarik u July 2019 da klam che ko wa ki tre thaw em hok ki yei khyndaw kamjooh iwa em hapoh iwa mut wot ya ki mar poh-khyndaw.
Chooh chooh ha ka Resolution da tyrwa ko wow em le kyrdan i rukom tih moochuni (Tiered Licensing Framework) ha Ri-loom Jaiñtia wa kynthup ya ka Tier-I neibynta kiwa tih mooyong dei bor samen, da ki kur næ ka yung; Tier-II kiwa tih mooyong pyrdi namo Medium-Scale Cooperative/Partnership wa ka Tier-III wow tih mooyong da ki karkhana.
Heijooh i por da tyrwa leh wow pynkrehkaam ya ki aiñ yada mariang kam ka Environment (Protection) Act, 1986; ka The Water (Prevention and Control of Pollution) Act, 1974; ka The Air (Prevention and Control of Pollution) Act, 1981; ka The Forest (Conservation) Act, 1980; wa ki hukum ka National Green Tribunal deilang ka Supreme Court of India.
Neiliang ki MDC ka Liang Pyrchah da pdiang ki ya kani ka Resolution deiwa dawa wow pynkylla ya ki kattu katni ki bynta ki wym ktah ya ka Council, kiwa khih mooyong khian wa kiwi. Hadien i phyllu yumut wa yillu da pdiang wow pynkylla ya ki kattu katni bynta wei da chong dorbar biang heipor nohchariñ sngi wei da rai wow pdiang ya kani ka Resolution.
Discussion about this post