Uwi u bru wa rahbor wei tynyap ya ka khynnah wa 11 snem i rta ha Delhi da chah siat u na kjat ha ki pulit hadien wa pyrchang u wow yut katwa dang takit ya oo ha i janmiet ka 23 tarik.
Ya uni u bru da tip kam u Bashu Kumar Singh (29) uwa kamai kari deiwa pynemkaam ya ki App wei da pyrchang u wow knieh ya ka Pistol u pulit heipor wa mut u wow yut ha Mandi Road katwa dang takit ya oo. Ki pulit da yah ki oo cha ini i thaw yow pynyoo u ya ki kammon leh u yei kaam.
Kamtæ ki pulit da siat ki oo na kjat kam wow yada ki pyn yaki hi wei da ye biang u kem ya u Bashu wei da kit cha Hospital wow chah sumaar u.
Ka khynnah toh kawa na Mehrauli, Delhi wei hei step synyaaw ka 22 tarik heipor wa dang thiah ko ha rood sarok deilang wa ka bei u pa chirup wa ki payu para ko, u Bashu da wan u wow rah ka heiwa da kit u ka da ka kari u deiwa pynbiej wow lai yah ke ka wei kani ka khynnah da yoh thiah biang ko hapoh kari wei da kit u ka kamwa 11-12 Km cheiliang u Mandi Road hajan Fatehpur Beri.
I takit ki pulit da chem wa ha ini i por da pyrchang u wow slaitbor ya kani ka khynnah tangwa ym ye i bor chynrang u kamtæ da maham u ka wei da lai yah u ka cha iwi i khloo wa em ha Gurugram-Faridabad Road wei da ksih u ka hadooh wa yap wei da murieh u yei metyap deiwa ban da ki moo.
Chooh chooh ki pulit da chem ki wa heipor wa rahbor u ya kani ka khynnah nei thaw wa thiah ko, da sñiaw u pa ko hawa kiad ko tangwa de em ko hapoh kari wei u Bashu da pynsangeh kari pyn hajan i thaw wa thiah ki wei da yoh u wow yut.
U pa kani ka khynnah da pyntip u cha ki pulit wa ka kari toh kawa em Number Plate rong stem, wei deini da ye wow tip ya ka kari deiwa pait lyngba ki CCTV wa em ha ki dukan chajan.
Neiliang ki pulit mar ya tip wa chah rahbor ka khynnah da chna ki ya ki Team wow takit yeiwa jia heiwa da yoh wow kem ya u Bashu du hapoh 6 kynta.
Discussion about this post