Ka Jaiñtia Students’ Movement (JSM) da dawa ko na u CM ka jylla, u Conrad Sangma wow pynbait næ wow pdiang ya ka Resolution yong ka JHADC chwa u lai cha Delhi wow yachem wa u Union Minister wow bichaar biang næ pynkylla ya ka Mines and Minerals (Development and Regulation) Act, 1957 (MMDR Act) hajrong ka mat tih mooyong ha Meghalaya.
Ka seiñ da pynkynmoo ko ya u Chief Minister ka Meghalaya wa ka JHADC dadep mynjur ko ya ka Resolution ha u bnai wa dep wow kyrpaad ya ka sorkar pyrdi wow pynkylla ya ki aiñ yow ye u tih mooyong hapoh ka Sixth Schedule.
Ka seiñ da ong ko wa ka MMDR Act, 1957 toh ka aiñ wa da chna da ka Parliament neibynta wow synchaar ya ki kaam tih marpoh khyndaw katkam ka Entry 54 yong ka Union List wa ka Article 246, tangwa i rukom krehkaam yong kani ka aiñ ha ki thaw Sixth Schedule wym ye ko wow tyngkheiñ ya ki laad yada ya ki tre thaw.
Da kdaw wa katkam ka Article 244(2) wa ka Paragraph 3(1)(a) yong ka Sixth Schedule, e bor ko ya ka JHADC wow chna aiñ hajrong i pyn emkaam ya ka khyndaw neibynta i myntoi yong kiwa chong chnong. Kani kynthup ko leh ya ka bor wow chna aiñ hajrong i tih ya u mooyong deiwa yada ya ka mariang.
Chooh chooh da ong ko wa ka Paragraph 9 yong ka Sixth Schedule da kdaw ko wa kiwon kiwon ki License næ Lease neibynta wow tih mar pohkhyndaw toh wow e da ka sorkar jylla hadien wa dadep ka syllok wa ka District Council neibhah i thmu yong ka riti synchaar toh wow yada ya i khyndaw wa ka dustur yong ki paidbah tre chnong lyngba ki Autonomous Council.
Ka JSM da ong ko wa ka Supreme Court ha ka mukotduma yong u 1971 dadep rai ko wa i hok paidbah hajrong i khyndaw katkam ka dustur ha ki thaw Sixth Schedule wym ye u pyndooh da ki aiñ paidbah khlem ka rukom riti kawa toh.
Ka Supreme Court ha ka hukum yong u snem 2019 da ong ko wow chah biang u tih ya oo ha Meghalaya deiwa bood ya ka MMDR Act, Mineral Concession Rules wa ki Environmental Clearance heiwa ka Supreme Court da tipmit ko ya ka Customary Rights tangwa da dawa ko wow pynkrehkaam katkam ka aiñ.
Hajrong ini waroh, ka JSM ngait skem ko wa em ka laad wow pynbait ya ini iwa da sah la 12 snem kattu hapoh Meghalaya. Wei ym emkaam wow pynkylla ya ka MMDR Act neibynta ka ri India waroh kawi tang wow pynkhlan næ pdiang ya ka Resolution wa dadep chim da ka JHADC wow yada ya i yoh khih yoh kreh ki paidbah ka Ri Jaiñtia.
Kamtæ da tyrwa ya ka sorkar jylla wow yarap ya ka JHADC wow thoh kamjooh wow mynjur ya ka “Jaiñtia Hills Traditional Mining Regulation Act” hapoh ka Paragraph 3(1)(a), wow e yumut ya u Lat wow mynjur ya ka katkam ka Paragraph 3(3).
Ka seiñ da ong ko leh wa ka MMDR Act ym em khang ko u tih mar pohkhyndaw tangwa batai ko ya i rukom tih ya ki. Kamjooh leh ka Sixth Schedule e bor ko ya ka JHADC wow chna aiñ hajrong i rukom pynemkaam yei khyndaw u chyiap neibynta i myntoi ki paidbah.
Hajrong kini waroh ka JSM da kyrpaad joor ko ya u Chief Minister wa chwa u lai cha Delhi wow kyrpaad ya ki Union Minister wow pynkylla ya ka aiñ ka sorkar India neibynta ki 140 klur ngut ki nong India, kam u CM uwa em i kitkhlieh wow sñiawbha e bor chwa ya ka JHADC wow chna ya ka aiñ neibynta 5 lak ngut ki paidbah Jaiñtia.
Da ong wym ye de u yang neibhah ki paidbah da kwah ki wow leh da ka Legal Mining.
Discussion about this post