U Montri Rangbah ka jylla, u Conrad K Sangma ynne ka sngi da ong u wa yow biang ka synchaar khadar wei wow chakri paidbah daw man ko kawa em yumut lada ki paidbah yoh myntoi ki wei pynbha pynmiat ko yei rukom im ki.
Yeini da ong u ha ka yalang wa da pynman da ka Joint Action Committee ki ar seiñ kitæ ka Jaintia Hills Truck Owner’s Association (JHTOA) wa ka East Jaintia Hills Truck Owner’s & Transporter Association (EJHTOTA) ha Shillong yow e khublei yei pynkrehkaam ya ka One-Time Settlement (OTS) Scheme ka sorkar neibynta ki kari kamai.
Ha kani ka sngi da pynkup burom ya u Montri Rangbah deilang ki Symbood Montri Rangbah, u Prestone Tynsong wa u Sniawbhalang Dhar kam wow tipmit yei bynta wa da leh ki yow pynkrehkaam ya kani ka Scheme.
“Ha i, ka roi ka paar ymtoh du ki sarok kiwa heh, i chna Stadium wa kiwi de tangwa kawon kawon ka rai toh u ktah ko yei rukom im ki bru deiwa bha wei kani man sakhiat ko ka synchaar khadar,” da ong u Conrad.
Heiyatoh wa ka OTS Scheme, u Conrad da ong u wa i rai yow maap noh ya kamwa Rs. 850 klur hadooh Rs. 1000 klur toh deiwa da booh hakhmat yei bha i miat ki hajar tylli ki manyung.
Da ong u wa kani ka poisa wa maap toh kawa ye u pynemkaam ya ka cha kiwa boon won ki kaam tangwa da sñiawthooh wa kamwa 16,000 ngut kiwa yah Truck wa kiwa ha-yung ki wei kamwa 2 lak ngut ki bru daw chah ktah bait ki, kamtæ da chim ya kani ka rai.
Hawa jubab yei chah kynthah ka sorkar wa pynlai yumut ko du ha ki kreh namo ki Project wa heh, da ong u wym em leh mylliñ ya ki kaam wa da sahteiñ nadooh kiwa yatoh wa kiwa sikai skur, i kyrchaan ya kiwa rep kamjooh kiwa seiñ khih.
Da ong u wa ki Project waheh pynyoo ko leh wa ka Meghalaya toh kawa ye u leh ya kam kini wei i jop hi toh wa kammon pynku i yei im wa man-ka-sngi ki bru.
“I ymtoh kiwa da biang lut, tangwa da rai kut wow pynpliah wei wow khana leh cha ki paidbah deiwa booh ya ki hapyrdi neibynta kawon kawon ka rai,” da ong u Conrad.
Discussion about this post