I lehkmen ka Argentina hadien wa jop ya ka England da 2-1 ha ka Semi-Final ka FIFA World Cup da pynkhyrngiat i ya kiwa boon hadien wa kiwa yalehke yong ka Argentinian da rah ki ya ka Banner wa ong “Las Malvinas Son Argentinas” iwa mut “Ki Malvinas toh ki Argentine”.
Ini da wanrah i yei kynaad neibhah ka FIFA ye ko wow yaklam wow pynchitom (Disciplinary Action) ya ka Argentina.
Kam wow kdaw heini ki Falkland Islands toh ki thaw wa ka Argentina khut ko kam ka Malvinas wa em ha South Atlantic Ocean. Neiliang ka UK wa ka Argentina da slem kam ki ya kini ki Island heiwa da mih leh ka thma ha u 1982 hapyrdi ki ar ri. Katkam wa man katni ka UK wa pait ya kini ki Island, tangwa ka Argentina hadooh katni dang kam ko ya ki.
Katkam ki kyndon ka FIFA da khang pyrchah wow rah ya ki kyntien wa yatoh wa i saiñ hima (Political Message), ki Slogan næ ki chaap (Symbol) hapoh madan yalehke wa ka Stadium heipor World Cup næ ki International Tournament. Itæ i daw ye ka FIFA wow chim wa i lehkmen ka Argentina da tyngkheiñ i ya kini ki kyndon.
Hadien wa jop ka Argentina, u Giovani Lo Celso wa u Nicolás Otamendi da rah ki ya kani ka Banner ya kawa da e da ki paidbah na ki thaw paitke (Stand).
Hadooh katni neiliang ka FIFA ympu em u ong ko iwon iwon hajrong ini tangwa kiwa boon da dawa ki wow takit wei lada chem wa da bakla, ka Argentine Football Association (AFA) kamjooh kiwa yalehke ye ki wow chah pynchitom.
Discussion about this post