Chah siat ka kari hadooh ar sien ha ki ar thaw ha North Garo Hills iwa poi cha i chah thang ka Police Station

Tura: Ki soo tylli ki seiñbhalang na Garo Hills kiwa kynthup ya ka Garo Students’ Union, ka Association for Democracy and Empowerment, ka Federation of Khasi Jaiñtia and Garo People wa ka A’Chik Youth Welfare Organisation da dawa ki wow pynchitom ya ki pulit kiwa emkti wow siat ya ki le ngut ki bru iwa jia ha ka miet yong ka 6 tarik uni u bnai heiwa da dawa leh wow behkaam noh ya u SP ka North Garo Hills wei wow bahkhlieh ka sorkar ya waroh i bai sumaar wa kiwi kiwi.

Da pyntip ki wa katkam wa chem ki ha ka miet yong ka 6 tarik ki pulit da pyrchang ki wow pynsangeh ya le tylli ki kari Pick-up kiwa lai lang rap jan kawi na kawi, kini ki le tylli ki kari toh kiwa dang wan pynhiar kwai na Assam wei manda poi ki ha Kaldang, da mih uwi u pulit nadien u dieñ uwa kaweh kti wow sangeh ki, kiwa yah kari neidaw wym tikna ki wa uwa kaweh kti toh u pulit namo u dkhot ki seiñ kieñ suloi kamjooh leh wada kot da kdang ki yei chah khrong poisa ha ki pulit dalai bait ki khlem sangeh.

Heipor 9:30 i miet manda poi ki ha ka yingkieñ wa em ha Rereng da em wa siat ya ki syndet syndet narood sarok khlem maham wei khlem daw, hapoh kani ka kari em le ngut kiwa chong wa sa uwi uwa em hadien (body).

Uwa yah kari hanlada toh kuli u da yah bait u wow lai cha Hospital, kani ka kari da chah siat biang ko sa chisien hajan ka Post Office, wei dalai bait ko heijooh i por da kbai da kyriaw ki wow yarap ki paidbah ya ki.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Manda poi ki ha Hospital, ki pulit leh da poi ki heijooh i por wei da sai ki ya ki na kari wei da pynthiah ya ki ha khyndaw wei da chah yooh ki na rdang wei da chah pynyang suloi ki wei hadien wa wan ki paidbah wa ong wa kini ki bru ymtoh ki dkhot seiñ kieñ suloi kamjooh leh em ki pulit wa tipmit ya ki da elaad wow chah sumaar ki.

Uwa yah kari uwa pytuid u Jamrak Sangma da toh salit u na rupai wei da toh u leh ha kti, u Milseng T. Sangma leh da toh ha rupai wa ha kti, uwa da mynsoo joor won uwa tip kam u Tumbul A. Sangma da toh u ha kpoh wei da psiah u kuli ha u nood u.

Kamtæ kini ki soo seiñ da ong ki wa i chah khrong poisa ki paidbah ha ki pulit nadooh ki kari khian, ki kari heh toh iwa tip lut waroh heiwa uwa yah kari da ong u wada chah lute u la le sien ha ki damok wa riam kam ki pulit.

Ya kiwa chah siat, kini ki seiñ da dawa ki watoh u yoh kreh sorkar ki, wei ka sorkar toh u pyntikna ko wa ki paidbah ymtoh u chah pynchitom ki hei pyrtuid wow yaleh pyrchah ya ki seiñ kiwa kieñ suloi.

Also Read: Chah thang ka Thanat ha Resubelpara hadien wa siat ki pulit ya kawi ka kari