Em kiwa ak kam ki wym chynna mar ya yoo ki yei kaam pynroi wa wanrah ka sorkar: Wailadmiki Shylla

U Wailadmiki Shylla, Montri ka sorkar jylla uwa man leh u MLA ka Jowai Constituency hawa klam ha ka yalang paan kyrchaan paidbah neibynta u kyrtong MP ka NPP, u Dr. DRL Nonglait wa da pynman ha ka 21 tarik uni u bnai ha chnong Ummulong kawa haap hapoh ka Nartiang Constituency, da pynsñiaw u ya ki kaam pynroi waphær waphær wa da wanrah ka sorkar neibynta u pynmyntoi pynsuk ya ki paidbah.

Da ong u wa hawa ka sorkar MDA hapoh i yahkhmat ka NPP da leh ko chiboon ki kaam neibynta i myntoi ki paidbah la heiyatoh i puræ puthi, i chait i khiah, ki luti syngkieñ, i wai laad wai luti ya ki khynroo ha jar jiar i sap ki, i pynyoh ki laad yarap waphær cha ki manbei, i kyrchaan seiñ khih seiñ khan wa kiwi, dang em won leh ki wym chynna najrong wa yoo yei kaam pynroi wa wanrah ka sorkar.

Hawa khana yei kaam pynroi ong u em boon kiyi kiyi wa da yaleh ka sorkar u pynsuk ya ki paidbah yow lait ki u lai cha jngai deiwa pynjan ki thaw e sumaar, ki thaw yalehke Sports, ki thaw puræ wei pynbha ya ki luti syngkeiñ wa kiwi.

Da kdaw u leh ya ka Wahiajer Multi Sports Complex Stadium yeiwa ympoi pyrkhat u yoh kat kani ka madan Football hapoh Nartiang Constituency, neitæ i mang u chna pynheh ya ka Ummulong CHC, ka Jowai Civil Hospital wa i yaleh pynku ya ki thaw uiñke suwari ha Ri-loom Jaiñtia wa da khriñ ya ki bru na kylleiñ.

Ong haroh u i roi i paar wa wan ha Jowai Constituency man i i kyrkhu ya waroh ki paidbah ka Ri-loom Jaiñtia deiwa kdaw kam ya ka Iawmusiang Complex ka Mini Secretariat kawa su dep hi kattu.

Neitæ khana u wa ka sorkar yarap ko Rs. 2 klur chi snem ya ki College waphær waphær ha Ri-loom Jaiñtia heiyatoh ka tulop kiwa sikai, kawa man chibynta i kyrchaan yow ye ki u e i sikai wa rap biang ya ki khynroo khyllood wa lai puræ.

Related posts

Poor i yakhih na Delhi cha Shillong yow dawa pynhiar chuki ya u Dharmendra

July 23, 2026

E khublei ka HANM ya u waheh chnong warim ka Ummulong wa pynlait im u ya kawi ka manbei

July 23, 2026

Da ong u leh wa i wanrah ya ki thaw puræ Doctor, Engineer hapoh ka jylla leh toh i pyrkhat jngai ka sorkar yow pynsuk ya kiwa wan na ki manyung wa duna i yoh i laa.

Wei chooh chooh yow pynstiñ ya ka yukit ka Kiang Nangbah Government College kawa man du kawi ka College sorkar ha Ri-loom Jaiñtia, ong u ka sorkar da chna College sorkar ko sa kawi ha Jalaphet, East Jaiñtia Hills District ka wow man leh i kyrkhu wa khroo ya ki paidbah ka thaaiñ.