U Sonam Wangchuk uwa da e yei kyrchaan yei yakhih ha Jantar Mantar, New Delhi wa yahkhmat da ka Cockroach Janta Party (CJP) deiwa chah thngan hadooh wa chah kit yabor cha Hospital, da rai u wow sangeh noh yei chah thngan hadien 26 sngi.
I rai wow sangeh noh yei chah thngan toh ynne hadien wa kylla tarik cha ka 24 tarik heipor kamwa 12:45 heiwa da wan leh ki montri ka sorkar pyrdi cha Hospital deilang u J.P. Nadda wa u Dr. Jitendra Singh heiwa ha kini ki sngi wa da lai da em hadooh 65 ngut ki MP na ki Party wa boon wa da wan yachem wei e chithi ki cha u Wangchuk wow sangeh noh u yei chah thngan.
U Wangchuk da ong u wa da klam che u ya ki kyndon wa dawa u nei yakhih wei hadien wa da yoh yei kular na ka sorkar kamjooh ki MP na kiwa boon ki Party wow pait ki deiwi yei rukom pynman Exam wei yeini leh u yatai hapoh Parliament, kamtæ da rai u wow sangeh noh yei chah thngan.
Da kular leh ha oo wa ka sorkar daw e yarap ko cha kitu ki manyung wa em ki khynnah wa pynkut yei mynsien neidaw wa jia ka NEET Paper Leak wei ym booh Case ki pulit pyrchah ya kitu kiwa lai puræ kamjooh ki khynroo wa pynman yei yakhih deiwa jai jai.
Neiliang won u Montri ka sorkar pyrdi, u Piyush Goyal da ong u wa hadien wa lai yachem u JP Nadda wa u Dr. Jitendra Singh ya u Wangchuk ha Medanta Hospital, Gurugram deiwa kular wa ka sorkar u leh ko yeiwa sñiawkhia u heiwa da sangeh u leh yei chah thngan, da ong u wa ini pynyoo wa chaniah u ha ka sorkar u Modi kawa chimkhia neiynta kiwa lai puræ heiwa ka sorkar leh neipor cheipor da ong ko wa u leh ko deiwa khor ya kiwa emkti ha ka Paper Leak wei wow pynkylla leh yei rukom pynman ya ki Exam yow myntoi ki khynroo khyllood.
U Wangchuk kam i dak wa da sangeh yei chah thngan da dih u da ka cha.
Discussion about this post