Ha ka yalang yalap Election MP chiteiñ samoi ka NPP yow paan kyrchaan neibynta u kyrtong yong ka, u Dr. DRL Nonglait hei janmiet ka 25 tarik uni u bnai ha chnong Nongtalang, kawa haap hapoh ka Amlarem Constituency, neiliang u Dr. Nonglait kam u kyrtong da e khublei wei pynsñiaw u i sñiawngooh ya ki paidbah neibhah kat chawa lai yoo u yei boon ki paidbah wa wan wow e kyrchaan ya oo.
“Hachwa wow lai O cha ki Constituency wa ki chnong ki thaw, phylla O wow chem wa ki paidbah dadep rai chwa ki wow e kyrchaan ya nga, heiyatoh wa ini pynsñiaw O i sñiawkhian wei sñiawngooh hakhmat yong phi ki paidbah,” da ong u Dr. DRL Nonglait.
Da pynrap u deiwa ong, “Kamwa da ong O ha kiwi ki thaw, heini leh i sbun yong phi kiwa wan da man ki sakhi wa sakhiat”.
Hawa khut kyntu ya ki paidbah u e kyrchaan ong u wa emkaam u yaksohktilang neibynta u wanrah i synchaar khadar wa skem yow hoi u biang ka imlang sahlang wa ki manyung mansem.
Wei i smat pdiang yong oo wow yakhun ya kani ka Election na ka NPP toh na ki kaam wa kreh ko, deiwa ong toh kani ka sorkar wa wanrah ya ka Resolution yow kyrpaad ya ka sorkar bei u pynpsiah ya ka ktien Khasi hapoh ka 8th Schedule wei wow pynkrehkaam ya ka ILP.
Neibynta kini ki ar tylli ki phang ong u ka sorkar jylla ym ye ko leh iyi iyi, kamtæ kam u kyrtong lada jop u daw booddien u ya kini, wei hawa booddien emkaam leh da u MP uwa em naka liang synchaar khnang yow suk i lai luti.
Deiwa e nongmuna u leh wa kawon kawon ka Bill wa wanrah daka liang synchaar leh rap suk u yoh ko yei mynjur.
Neiliang u Symbood Montri Rangbah ka sorkar, u Sniawbhalang Dhar hawa paan kyrchan neibynta u Dr. Nonglait da pynsñiaw haroh u ya ki kaam ka sorkar jylla kam ka One-Time Settlement Scheme yow myntoi kiwa yah wa ki tre kari kamai, heiwa da yarap ko u su dep ya ki dan, wei ini i leh ka sorkar toh wa em ko i sñiawkhia yei kaam kamai kajih ki paidbah, neitæ i yarap wa boon jait ka sorkar ya kiwa kwah seiñ khih wa kiwi.
Hajrong ki kaam ka sorkar ong u ki wym sñiawthooh ye ki u woh daw, tangwa kiwa kreh yei kaam sñiawthooh ki yei myntoi, khamtam heiyatoh ki kaam uiñke suwari heiwa ki paidbah kani ka thaiñ sñiawthooh ki rap bha ya ki laad yarap wa ka sorkar wanrah ko.
Chooh chooh ong u neiwa ku ki kaam uiñke suwari rah ko leh yei naam i burom ka jylla Meghalaya cha kiwi tawon ki jylla ka ri.
Da pynsñiaw haroh u wa neibynta u pynsuk chooh chooh ki luti syngkieñ heiyatoh ki kaam uiñke suwari cha ka thaaiñ Amlarem, ka sorkar da mang ko wow nang thooh ki laad ki luti ha chirup i yakrehlang ki paidbah.
Ha kani ka sngi da yoh leh i klam na u Dr. Henry Lamin wa kiwa psiah thymme cha ka NPP napoh ka Raij Buam.
Wei neiliang ka NPP 7-Amlarem Block da pdiang burom haroh ko ya kattu katni ngut kiwa yahkhmat kiwa na kiwi won ki Party kiwa wan psiah cha ka NPP.
Discussion about this post