Kem ki pulit sa uwi heiyatoh wa i chah tooh kari wei chah pynyap uwa na West Jaiñtia | Le ngut kiwa emkti

Ki pulit ka West Jaintia Hills District da yoh ki wow kem ya waroh kiwa suba emkti wow pynyap ya u Damehi Mulieh (28 snem) uwa na chnong Ialong, Luti Tuber heiwa yei metyap u da chem na Khliehriat, EJHD ha ka 31-07-2026, wei heiyatoh wa ini da kem ya ki 3 ngut ki bru.

U Damehi toh uwa da mih na yung ha ka 28-07-26 deilang ka kari heiwa ym em de poi yung u.

Kam wow pynkynmoo wa ha ka 31 tarik u July 2026, ki pulit ka Jowai Police Station da pyntip cha ki wa kawi ka kari Maruti Alto K10 kawa em Number ML-05AG-0285 da yoh wow kem ka da ki pulit ka Gumrah Police Station, Cachar District, Assam wei hapoh da em ar ngut ki bru.

Kamtæ ki pulit ka Phramer Traffic Cell, WJHD da lai ki cha Gumrah, Assam wei deiwa ya krehlang wa ki pulit ka thaaiñ da kem ya ka kari hadien wa dep u leh yeiwa emkaam chirup ki bru wa em hapoh wei da wanrah ki cha Meghalaya yow pynman yei takit.

Ha ini i jooh i por da chem leh yei metyap u Damehi na Khliehriat wei kiwa ha-yung ha-sem u da pyntikna ki wa ka kari toh ka yong oo. Kamtæ ki pulit da booh ki ya ka Case kawa yatoh wa ki kaam pynyap bru wei tooh kari hapoh ki Section 103(1) wa 140(1) ka Bharatiya Nyaya Sanhita (BNS).

Kini ki ar ngut kiwa chah kem na Assam toh u Dapjingkmen Paslein (26 snem) uwa na chnong Lakaseiñ, EJH wa u Samuel Iakai (25 snem), uwa na chnong Umkyrpong, EJH.

Hadien wa da pynman chooh chooh yei takit, ynne da yoh wow kem sa uwi, uwa tip kam u Duniwankmen Sutnga (26 snem) uwa na chnong Khaidong, EJH.

Related posts

Chah kem ki ar ngut heiyatoh wa i chah pynyap wei tooh ya ka kari uwa na West Jaiñtia Hills

August 2, 2026

Kem ka CBI ya u Project Director ka NHAI Shillong

July 6, 2026

Ya kni ki le ngut waroh dadep wow lai rah ki hakhmat ka yung bichaar wei ka takit dang lai ko chakhmat yow tip thij kammon da jia ini waroh kamjooh wow pynlang chooh chooh ki sabut.

Ka West Jaintia Hills Police da pynsñiaw ko yei sñiawngooh yei smat e yarap ki Gumrah Police heiwa deiwa leh ki da ye wow pynman ya ka takit kawa jop.

Kini ki ar ngut kiwa chah kem da ki pulit ka Gumrah toh heipor wa dang pyrchang ki wow tyrwa dai ya ka kari khlem ki kot ki sla.

Ha iwi won i liang, ki pulit da kyntu ki ya ki paidbah wow syndong bha ya ki kari ki wei lada yoo ya iyi iyi wa suba ki wow Phone ki ha u Police Emergency Helpline-112.