Hadien wa mih ka khubor wa pynbaad u Waheh Chnong wa u Assistant Waheh Chnong ka Mynkrem ya u Dolloi ka Elaka Shangung, u Chanki Langbang wa lehbor u ya i khloo ka Dorbar Chnong Mynkrem heiwa da pynbaad wa chah maham ha u Dolloi, kamtæ ki dkhot ka Dorbar Elaka waroh da phylla wei sñiawkhia ki yeini.
Ha ka 04-08-2026, ka yung krehkaam ka Dorbar Elaka da pynman ko ya ka Dorbar Bah yong ka Elaka Shangpung heiwa da em ki Waheh Chnong, Assistant Waheh Chnong wa kiwa kitkaam chnong yong ki 30 tylli ki Dorbar Chnong wa ki khon ki hajar yong ka Elaka neibynta wow phyllu yillu yeiwa chah pynbaad u Dolloi samen wow dai ya ki dieñ na itai i khloo.
Kamtæ ka Dorbar Elaka da pynche ko wa ha ka yalang yong ka Dorbar Elaka wa man ha ka 14-12-2024 ha yung krehkaam ka Dorbar Elaka, da rai wei mynjur kam ka Dorbar Elaka wow dai ya ki dieñ na ki khloo yong ka Elaka Shangpung wei ha u July uni u snem ka Dorbar Elaka da yoh yutip ko wa em ki dieñ kiwa da pat nei wan ka la’ær ha Khloo Lakaweng, kamtæ ka Dorbar Elaka da e bor ko ha u Dolloi wow phah bru wow pam ya ki dieñ tangwa da chah khang noh ki ha u Waheh Chnong ka Mynkrem. Kamtæ hadien wa u Dolloi da yoh yutip u na utæ u bru wa mut wow pam ya kitæ ki dieñ wa chah khang ha u Waheh Chnong ka Mynkrem, neiliang u Dolloi leh da Phone u cha u Waheh Chnong Mynkrem da i ch’oh wa jem kam u khlieh synchaar ya ka Elaka wow kylli weileh wa khang ya ki bru wow pam ya ki dieñ, wei ymtoh kamwa pynbaad u Risnainlang Langstang, Waheh Chnong Mynkrem.
Heiyatoh won wa iwa ong u Waheh Chnong ka Mynkrem wa u Dolloi da thmu u boonsien wow thombor ya ini i khloo kamwa da kdaw ha ka 01-04-2025 wa u Dolloi wa ki dkhot yong oo da lai tympiah ki ya u morcha i Khloo Raij, ka Dorbar Elaka da kubur ko kamwa da kdaw ha katai ka sngi wei kamwa jooh myllien ki dkhot ka Dorbar Elaka ryngkat wa u Dolloi da lai pait ki ya i thaw wa ki khloo ka Elaka man-i-por, wei jia ryngkat wa ha katai ka sngi da lai pait ki cha itai i Khloo “Lakaweng”, heiwa da chem wa ki morcha wa dang dep sæh khlem tip ka Dorbar Elaka, kamtæ ki dkhot ka Dorbar Elaka da tympiah ki ya kini ki morcha wei ymtoh u Dolloi wa tympiah ya ki kamwa da pynbaad u Waheh Chnong Mynkrem. Heijooh i por ka Dorbar Elaka da pynche ko wa ha ini i thaw ym em itæ i Khloo Raij næ Khloo Dorbar Chnong kamwa kam da u Waheh Chnong ka Mynkrem neibhah nadooh nachwa ini man i i khloo ka Elaka wei toh ka Elaka kawa pait wa sylli wei em hok hajrong ini i khloo.
Hajrong ka chithi ha ka 12-04-2025 wa ong u Waheh Chnong Mynkrem wa dadep phah chithi cha u Dolloi tangwa u Dolloi ym em u leh u iwon iwon, kamtæ ka Dorbar Elaka da pynche ko wa hadien wa khana u Dolloi ha ka Dorbar Elaka, ka Dorbar Elaka da phah ko ya u Dolloi wow jubab ya katai ka chithi wa u Waheh Chnong Mynkrem da phah u samen cha u Dolloi neibhah ka chithi ym em u che ko cheiwon kwah u Waheh Chnong Mynkrem u thoh ya ka heiwa da thoh cha u Secretary Village Court katwa da kyrpaad won ha u Dolloi wei kamtæ ha ka chithi wa u Dolloi wa ki dkhot yong oo da tympiah ki ya u morcha ha i khloo wa tip kam i “Pohsikhmat” tangwa ki dkhot ka Dorbar Elaka ym em tympiah ki ya ki morcha wei da tympiah ki ya ki morcha wa em ha tymbud i khloo ka Elaka wa pyrtuid “Lakaweng” kiwa dang dep sæh moo tooh deiyi deiyi neibhah nachwa ym jooh em morcha ha kitai ki bynta. Ka Dorbar Elaka da pynche ko wa itai i khloo ymtoh i khloo hok kynti samen yong u Dolloi næ ka Village Court. Hajrong wym che ka ujor, u Waheh Chnong Mynkrem dang booh u sa i por wa tbian, ha ka 18-04-2025 wa du 5 sngi wow pyndep, kamtæ ka Dorbar Elaka ym ye ko wow chim rai ha i por wa tbian.
Heiyatoh won wa ka chithi 12-04-2026 wa ong ki ha ka khubor wa u Dolloi ym leh u iwon iwon, hei sakhiat ka Dorbar Elaka da yoh ko yei pynche na u Dolloi wa ym em yoh u ya katai ka chithi katkam wa kdaw ha katai ka tarik.
Hajrong ka chithi 30-06-2026 wa da phah ki cha u Dolloi wa ong ki ha ka khubor wa u Dolloi ym leh u iwon iwon, ka Dorbar Elaka da ong ko wa kani ka chithi wa e u Waheh Chnong Mynkrem kawa em ka phang “Ka jingpan jingtip/report” toh chaphang ka Court Case hapyrdi ka Hula Mynchong wa ka Dorbar Chnong Mynkrem, iwa dang em hapoh i bichaar ka Village Court, Elaka Shangpung wei u Dolloi ym em hok u wow jubab.
Heiyatoh won wa i kam u Waheh Chnong Mynkrem wa em ki bru samen wa kwah u yoh dai ya ki dieñ na i khloo wow kamai spah, ka Dorbar Elaka da ong ko wa kam u waheh chnong lada tip u wa em kam kitæ ki bru wa chim kabu, toh u pyntip u cha ka Dorbar Elaka kamwa da leh da kiwi ki Dorbar Chnong heiwa ka Dorbar Elaka em ko ki khloo. Wei ini pynyoo i wa u Waheh Chnong Mynkrem hi wa kwah wow e laad ya ki bru chim kabu wow ah ya ki dieñ na i khloo ka Elaka.
Hajrong i kam u Waheh Chnong Mynkrem wa lada toh hok yong u Dolloi samen næ ka Elaka, toh u wan mih ki chakhmat deiwa wanrah ya ki kot ki sla lada em kiwa da e da ka Dorbar Chnong cha u Dolloi næ cha ka Elaka, kamtæ ka Dorbar Elaka da pynche ko wa katkam i khana pateiñ na ki waheh ka chnong Shangpung wa Elaka Shangpung da ong wa ka chnong Mynkrem toh ki bri ki pynthor kiwa na chnong Shangpung ha ki por nachwa, kamtæ katwa dang lai ki por dang boon kiwa wan rep wa wan sah ha kini ki pynthor ki bri wei hapoh yong u (L) Long Phyllei da paan bor na ka Dorbar Elaka wa na u Dolloi wow seiñ noh da ka chnong ka thaw ya kawa khut katni kam ka chnong “Mynkrem”, wei ini i khloo ymtoh i khloo samen u Dolloi kamwa da pynbaad kamtæ ka Dorbar Elaka da rai ko leh wow hukum ya u Waheh Chnong Mynkrem wow wan mih chakhmat deiwa wanrah ya ki kot ki sla wow pynsakhiat yeini.
Hajrong i kam u Waheh Chnong Mynkrem wa du hadien wa wan ka District Council tæ ye u mantre ya i khyndaw ki chyiap. Ka Dorbar Elaka da beiñ ko yeini i ong deiwa ong wa chwa wow mih ka District Council, ki Raij, ki Elaka wa ki bru samen leh ye ki wow mantre ya ki thaw ki bhaw yong ki katkam i khana pateiñ ki Raij wa ki Elaka hapoh ka Ri Jaiñtia waroh kawi wa da em chwa ki nadooh nachwa, ymtoh kamwa klam kulmar u Waheh Chnong ka Mynkrem.
Ka Dorbar Elaka dei sñiawkhia yeini waroh i pynbaad u Waheh Chnong Mynkrem wa u Assistant Waheh Chnong Mynkrem pyrchah ya u Daloi da phah ya ki wow wan paan-maap ki wut-wut na u Dolloi, u Chanki Langbang hakhmat yong ka Dorbar Elaka hapoh 3 sngi lym kamtæ ka Dorbar Elaka daw ujor ko cha ki bor wa hajrong pyrchah ya ini i kamtre ya ki thaw wa ki khloo ka Elaka.
Discussion about this post