Ki pulit ka Anti-Narcotics Task Force (ANTF), Meghalaya, ha ka 10 tarik uni u bnai da yoh ki wow kem yei Heroin wa khia 32.64 grams iwa da antaad wa chongdor ₹5 lak haroh.
Deiwa tip tikna yeiwa daw em kiwa khayi drugs, neiliang ki bru ka ANTF da booh ki kattu katni tylli ki thaw pynsangeh kari ha ka thaaiñ Umiam neidaw wa da tip wa kini ki bru toh kiwa lai cheiliang Shillong.
Hei janmiet da wan chwa kawi ka kari wa em Number AS-01-AV-1166 wei da ksoh ka ha laad Umiam heiwa hapoh da em u Allan Marwein, uwa chong chnong ka Mawlai Nongkwar, Block-13, Shillong, wei da kyrneh ya ka kari deiwa emlang kiwa sakhi wei da chem ya kawi ka khieh sabon wa em i lakhit hapoh wei hadien wa Test da pyntikna toh i Heroin wa khia 10.93 grams.
Hei miet won da yoh u ksoh ya kawi ka Scooty wa em Number ML-05-AB-9546 kawa mut wow yut na ka thaw pynsangeh kari wa em ha Umiam kawa yah da u Jaziel Nongjop Syiem tangwa da yoh wow ksoh ka wei na uni da chem ar tylli ki khieh sabon wa murieh hapoh ka Jacket wa sap u, wei hadien wa Test da pyntikna toh i Heroin wa khia 21.71 grams.
Ya kini ki ar ngut da kem ki yow leh yeiwa emkaam katkam ka aiñ wei ka takit da lai ko chakhmat yow chemdien ya kiwi de kiwa emkti ha kini ki kaam khayi drugs.
Yei drugs da kem katkam ki kyndon ka aiñ Narcotic Drugs and Psychotropic Substances Act, 1985.
Discussion about this post