Ki khon ki jait tngoo ki wym jooh em hapoh India kiwa tip kam ki Orangutan, da chem ya kamwa 5 tylli ki khon khian ki na iwi i khloo ha Balasore District ka Odisha iwa da suba toh kiwa wanrah da ki bru wa khayi tooh ya ki mrad khloo iwa da jia ynne ka sngi.
Ya kini ki khon tngoo da chem ha i bynta wa haap hapoh ka Udaypur Forest Division wei neiliang ka Wildlife Crime Control Bureau (WCCB) da takit ko wa kammon kini ki tngoo kiwa da em hei maa wow wiar jait dapoi ki ki cha kani ka thaw.
Neiliang u Forest and Environment Minister, u Ganesh Ram Singhkhuntia da pyntip u wa da chem ya 5 tylli kini ki khon ki tngoo Orangutan da ki bru ka chnat Forest heipor wa lai Patrolling.
Kini ki jait tngoo toh kiwa chem ha ki khloo (Rainforest) ka Malaysia, Indonesia, Borneo wa Sumatra kiwa man ki thaw wa em ha Southeast Asia. Wei da subai wa da em wa pynlait ki ha ini i khoo ha Balasore District kawa em pood leh wa ka West Bengal da ki bru wa leh ya ka International Wildlife Smuggling, da ong u Montri sorkar.
Da antaad u leh wa kini ki tngoo toh kiwa chongdor Rs 20-Rs 25 lak uwi manda dai ki.
Neiliang ka sorkar jylla da lai booh ko ya kini ki tngoo cha ka Nandan Kanan Zoo wa em ha Bhubaneswar.
U Balasore DFO, u Pratik Praksh Indalkar da khana u wa kini ki tngoo man ki kiwa chait wa khiah.
Discussion about this post