Ka seiñ kiwa sikai skur SSA kawa tip kam ka Meghalaya SSA Schools Association (MSSASA) Central Body da e jubab ko yei dawa ka Voice of the People Party (VPP) wow kyrriah noh ya u Education Commissioner & Secretary, u Vijay Kumar Mantri, deiwa ong wa ini toh i wym em miat wei da kylli leh yei daw wa kdaw chynnam ya uni u sahep sorkar uwa da heh da san hei krehkaam.
Neiliang u President ka MSSASA, u Aristotle C. Rymbai da ong u wa kam ka seiñ da khyrngiat ko wow yoo yei dawa u heh ka VPP, u Ardent Miller Basaiawmoit, neibhah u Vijay da pynkrehkaam u yei rai wa da chim ka sorkar wei ym ye wow pynbahkhlieh ha oo ya ki kaam wa da mynjur ka sorkar.
U Aristotle da ong u wa u Vijay toh u sahep sorkar uwa kreh chitom, uwa dohyap wei uwa ap yei eh i khoo kiwa sikai skur.
Da ong u leh wa hadooh i rukom pynwandur ya ka tulop kiwa sikai leh toh deiwa yaklam wa waroh ki liang wei ymtoh ka rai wa chim samen da u Education Commissioner donhi.
U Aristotle da kdaw u leh wa da ki phaw snem kiwa sikai SSA, Ad Hoc wa kiwi de ki jait kyrdan wa da yabhah ya kiwa sikai toh kiwa da kreh da ka tulop kawa da booh thij wei i rukom kreh leh i wym em skem. Tangwa manda poi kani ka sorkar wa katni da pynkylla dur ko ya ka tulop kawa yahaap wa i por wa da e chakri kiwa sikai, da e leh yei yada i kreh ki hadooh wow pynyoh leh ya ka Contributory Provident Fund (CPF) ya kini kiwa sikai.
Heijooh i por u Aristotle da ong u wa iwa da pynkhreh ka sokar ymtoh iwa da biang lut iwa dang ye wow pynbha pynmiat wei yeini toh u leh deiwa em i yaklam ha waroh ki liang nadooh kiwa sikai deilang ka sorkar wei ymtoh deiwa kdaw kti ya ki sahep sorkar.
Da ong u leh wa emkaam ka Policy kawa chisur neibynta kiwa sikai neibhah leh ki i jooh i kaam, kreh ki i jooh i kynta wei toh u yoh ki ka jooh ka tulop, i myntoi wa kiwi de.
Discussion about this post