Ka seiñ Meghalaya People United Front (MPUF) deilang wa ka Jaintia Revolutionary Council (JRC) ha ka 16 tarik uni u bnai hei yahkhmat u President ka MPUF Laskein Block Circle, u Peter Ram Sutnga wa ka MPUF Laskein Unit, u Dapmain Lyngdoh deilang u President ka JRC, u Leo Fernando Suiam da lai ki cha ka CHC Laskein hadien wa da yoh ujor na ki paidbah wa boon walang.
Neiliang ki bru paidbah da ong ki wa joor wa chah klam khor ki ha ki Nurse wa kiwa kreh kani ka thaw sumaar nadooh kiwa thiah kjut wa kiwa wan thooh dawai wei da ood leh heiyatoh wa ki Test wa boon jait, kamtæ neiliang ki ar seiñ da yoh ki yachem wa u Dr. D. Suchiang uwa man kam u Medical Officer yong kani ka CHC heiwa da yoh wow pynsñiaw ha oo ya kini ki kaam wa da ood ki paidbah wei da kular u hakhmat ki ar seiñ wow chimkhia u yeini i kaam heiwa da ong u leh wym hoi de u jia kamni neini chakhmat.
Heiyatoh won wa i dawai hapoh kani ka CHC, da pyntip wa dadep thoh boon ki chithi cha ki bru sorkar kiwa toh u pait ya ini i kaam tangwa hadooh kattæ leh ym pu yoh iwon iwon i jubab, kamtæ neiliang ka MPUF dawa ko na kiwa toh u pait yeini wow pynbiang ki yeiwa emkaam kani ka CHC khnang wa ki paidbah wa chong chnong ka thaaiñ u yoh myntoi ki neibhah kiwa boon hi toh kiwa chaniah du ha kani ka CHC heiwa kiwa boon toh kiwa dooh wa duk.
Ka seiñ da ong ko leh wa daw lai yachem ko wa ka DMHO ka District yow yoh u yaklambha heiyatoh wa kani ka kaam neibhah kani toh ka kaam yap kaam im yong kani ka thaaiñ neidaw wa em boon i duna ha kani ka CHC.
Discussion about this post