Ynne ka sngi da pynman ya ka yalang wa tbian ha Yungwalieh ka Panaliar, Jowai wow sdang pynyoo noh ya ka phlim wa da e pyrtuid ‘Kñi’ heiwa ka MDC ka JHADC na Narpuh Constituency, ka Deiwipaya Tongper da man ko kam ka kongsan heiwa da yoh i klam pdiang burom na u Goldenstar Suchiang.
Ya ka phlim da pynmih da ka Chwa Syiemlieh Production wei uwa pynwandur ya ka phlim toh u Section Syiemlieh uwa da ong u wa katni ha ki kaam chna phlim da yaleh wow e laad ya ki khynroo khyllood wow yoh kreh ki dei wow ak, wow rwai wa kiwi de ki jait kaam.
Chooh chooh da pyntip u wa ya kani ka phlim da pynyoo le sien heijooh i por, itæ ha Panaliar, Jowai neitæ ha Bijou wa ha Anjalee Shillong.
Ha kani ka phlim da ak da ka Phira Dohtdong, ka Wanrida Pyngrope, u Goldenatar Suchiang, u Shnalad Dkhar wa kiwi.
Ka Deiwi hawa e i klam da ong ko wa ki phlim Khasi Pnar emkaam bha wow pynchlur ya ki wei sñiawkmen ko wow yoo wa ka kani ka phlim u pynyoo nyngkong ya ka ha Ri-loom Jaiñtia.
Da ong ko wa kam ka jaitbru wa chim jait na ka bei tangwa u ma man u uwa emkaam bha ha ka yung ka sem deiwa yaroh ya ka Trailer ka phlim wa pynyoo yei e kti lut u neibynta ki pyrsa.
Chooh chooh da ong ko wa u ma næ ki kni man ki kiwa emkaam bha neibhah wot ka leh chwa wow lai cha ki kam saiñhima da lai kynjoh ktien chwa ko cha ki.
Ka Deiwi da kyntu ko leh ya ki paidbah na Ri-loom Jaiñtia wow wan pait ya kani ka phlim khnang wow yoh myntoi chiboon na ka.
Ha kani ka sngi da yoh leh i klam na u Waheh Chnong ka Panaliar, u Careme Phawa wa kiwi de.
Neiliang kiwa wan pait ya kani ka phlim da yaroh ki ya ka deiwa ong emkaam bha ko khamtam ha ka juk wa katni khamtam ya ka yung ka sem kamjooh wa ka imlang sahlang.
Ya kani ka phlim u pynyoo nadooh 17 hadooh 20 tarik uni u bnai heipor 3:00 waje i sngi, 5:00 waje i janmiet wa 7:00 waje i miet ha Panaliar.
Discussion about this post