Ki paaid wa ngait ka Balang Unitarian wa em ha Ri Khasi, Jaiñtia wa Karbi, ynne ka sngi da kynmoo burom ki ya ka sngi sdang ka Balang wa da seiñ da u Babu Hajom Kissor Singh Nongbri nadooh u snem 1887, wei kattæ ka Balang Unitarian da khynjoh ko cha u moomer lyngkhooh dap 139 snem i lai luti næ ka 139th Anniversary.
Wei kamwa ka Balang Unitarian ha Jowai toh ka seiñbei, da sakhi wa i lehkmen kynmoo burom ya kani ka lyngkhooh dap snem leh man ko kawa chongkun da i chimbynta chongchit ki para wa ngait nadooh ka yaseiñ step, yaseiñ sngi wa ha i lai Procession heipor janmiet ha chirup i rahlang leh ki dongmusa wei deiwa ya rwailang tymbood luti.
Hei yaklam wa u Rupaia Lamar uwi na ki waheh ka Balang Unitarian Jowai, ong u ya kani ka niam da seiñ deiwa emyatoh leh wa i dustur riti u Khasi, man ko leh kawa pdiang ya kiwon kiwon ki dustur khamtam haka imlang sahlang.
Neidaw i kwah wow pynbha ya kiwi da chim kylliang ko naka dustur ki Christan kawa em i sñiawthooh yei ngait hei pynchongnia khamtam hei stat i tip wa i thoh, kamtæ da pdiang ya ka Bible tangwa yow pynemkaam deiwa pynchongnia ym deiwa pdiang lut waroh.
Heiyatoh wa kani ka sngi Anniversary ong u i yumut toh yow pynthymme yei ngait næ ka por wow uiñ chei tynre i ngait neibynta u pynthymme yei ngait i sñiawthooh kam ki paaid wa ngait.
“Wei kamwa da tip leh ya kani ka niam kam ka niam maya ya u bru maya ya u Blai, iwa mut ym myntoi wow ong maya Blai i khlem da maya ya ki para bru wa yoh i u yoo,” da ong u R. Lamar.
Neitæ hajrong ka phang yong uni u snem kawa ong “Sha jingkhot lashai ngan shah shkor”, ong u kani ka phang khut wei kyntu ko ya ki para wa ngait u pyntikna ki neibynta u pynskem yei ngait i sñiawthooh.
Heijooh i por ha kam kani ka sngi ong u jooh em leh i chim smai yow sumaar ya ka rymaw yow yarap para bru, yow man kyllooid mynsiem wa kiwi.
Discussion about this post