Ka Bharatiya Janata Party (BJP) kawa jop 2 ngut ki MLA ha u snem 2023 wei kawa em ha ka sorkar synrop ka Meghalaya Democratic Alliance (MDA-II) kawa yahkhmat da ka NPP nadooh u snem 2018, da ku syndet i boon paaid ha Meghalaya na 2 ngut cha 10 ngut ki MLA wei da yoh ko leh 2 ngut ki MDC ha KHADC najrong 2 ngut ki Montri ha ka sorkar hadooh kattæ.
Ini i ku syndet ka BJP ha Meghalaya toh hadien wa 8 ngut ki MLA ka UDP da chah pdiang sñiawbha ki yow wan cha ka BJP ynne ka sngi ha nongbah Delhi.
Ki 8 ngut ki MLA ka UDP kiwa da chah pdiang sñiawbha ha ka BJP toh u Lahkmen Rymbui MLA ka Amlarem, u Kyrmen Shylla MLA ka Khliehriat, u Balajied Kupar Synrem MLA ka Shella, u Synsharkupar L Thabah MLA/MDC na Sohiong, u Olan Sing Suin MLA ka Mawsynram, u Mathew Beyondstar Kurbah MLA ka Mawphlang, u Mayralbon Syiem MLA ka Nongpoh wa u Pius Marwein MLA/MDC ka Ranikor/Langrin.
Kamwa da pynsñiaw da kini ki MLA, i psiah cha ka BJP toh deiwa booh boon ki dawa na ka sorkar BJP ha Delhi yow pynmankaam yei tipmit ya ka ktien Khasi/Garo hapoh ka 8th Schedule, i pynkrehkaam ya ka ILP næ da ka MRSSA kawa khlan yow yada na kiwa na baar, u booh ki kyndon wa suk yow tih mooyong, u kyrriah ya ki bru na Them Metor najrong kiwi de ki dawa.
Hawa pait cha ka chuki hapoh ka sorkar wa yahkhmat da ka NPP, ka BJP kattæ em ko 2 ngut ki Montri, u Sanbor Shullai wa u Lahkmen Rymbui, wei kamwa man kattæ da yoh khubor leh wa dang paan chooh chooh wei u ye u jia ini toh du deiwa pynhiar chuki ya u President ka UDP uwa man leh u MLA ka Mairang na ka chuki Montri sorkar wei yow e cha uwi u MLA ka BJP.
Discussion about this post