U Treasurer ka seiñ NPP uwa man leh u Political Secretary yong u Montri Rangbah ka jylla, u Daniel Thangkhiew, da ong u wa i pynpoor ya ki khubor ha ki rynsan Social Media wa ki MLA ka NPP em ki ha Delhi yow yachem wa kiwa yahkhmat ka BJP toh du ka khubor wow yahbakla ya ki paidbah ka jylla Meghalaya.
“I da yoo i ha ha ki rynsan Social Media kiwa da kam wa 22-24 ngut ki MLA ka NPP da em ki ha Delhi yow yachem wa kiwa yahkhmat ka BJP neibynta u wanrah yei kylla ha ka saiñ pyrthai ha Meghalaya. Ini i toh ka khubor thok, wei ka buit yong ki kattu katni kiwa pyrchang wow yahbakla ya ki paidbah ka jylla Meghalaya,” da ong u Daniel lyngba ka Phone uwa em kattæ ha Delhi.
Da ong u wa ka NPP toh kawa yatylli wei dang ha kini ki sngi u Montri Rangbah ka jylla, u Conrad K Sangma da yachem u wa ki MLA yong ka NPP ha Shillong.
“U Montri Rangbah ka jylla wa waroh ar ngut ki Symbood Montri Rangbah ka jylla kiwa kynthup ya u Prestone Tynsong wa u Sniawbhalang em ki ha nongbah Delhi wei i lai ki cheini toh yow yachem wa ki heh ki chnat ka sorkar pyrdi neibynta wow booddien ya ki kreh (Project) ka jylla Meghalaya wei ymtoh wow yaklam ya ki kaam saiñ pyrthai kamwa da poor ha Social Media,” da ong u Daniel.
U Daniel da ong u wa ki MLA wa ki MDC ka NPP yatylli ki kawi wei kattæ dang pynlai yei bor wow pynkhreh neibynta ka Election chiteiñ samoi yong ka MP Lok Sabha wa ya ka Election MDC yong ka Garo Hills Autonomous District Council (GHADC) yow pyntikna wa ki kyrtong ka seiñ u jop emburom ki.
Da ong u wa i lai psiah ki 8 ngut ki MLA ka UDP cha ka BJP ym ktah ko iyi iyi ya ka sorkar jylla kawa yahkhmat da ka NPP wei kini ki ar tylli ki Party toh kiwa da emlang chwa hapoh ka sorkar MDA-II kawa da yahkhmat da u Conrad K Sangma.
Discussion about this post