Ki tre thaw, kiwa rep wa ka chnong Shnongrim, East Jaiñtia Hills ynne da lai ki hakhmat ka Fact-Finding Committee kawa da thung ka sorkar yow takit heiyatoh wa iwa jia ha ka Public Hearing ka Shree Cement.
Neiliang kini kiwa lai yachem wa kani ka Committee da ong wa ki wa da chah knieh i thaw yong ki wa em ha Lum Syrman ka Elaka Nongkhlieh kawa man ka thaw tih moochuni ka Shree Cement Pvt Limited.
Da ong ki leh wa ki biang ki ki kot ki sla nadooh ka Patta, ka Land Holding wa da yoh na ka JHADC kamjooh ki Map wa kiwi de kiwa pynyoo ya u pood u ang.
Da khana ki leh wym em yoh laad ki wow lai chimbynta ha ka Public Hearing kawa da pynman da ka MSPC ha ka 31 tarik u July 2026 neibynta ka Shree Cement heiwa heipor wa lai cha ka Public Hearing da chah khanglaad ki ha ki pulit najrong wa chah pyntieñ pynsmiej ki manda poi ha Lad Shnongrim.
Da em leh i chah kawang moo ki ha i bynta wa chah tih u sarok ka sorkar wa em ha lad Tongseng. Da em leh kiwa pam pyntkut ya ki yingkieñ wa chna da ki siej yow kaap ya ar tylli ki wah kitæ ka Wah Liteiñ (Shynraing) wa ka Wah Krong yow poi cha ka thaw pynman ya ka Public Hearing.
Da khana leh wa em kamwa 177 tylli ki manyung kiwa em hok ha u Lum Syrman wei em kamwa 158 tylli ki thaw rep kiwa da ri da sumaar da boon boon snem nachwa heiwa da pyndait leh wa ki sabut kiwa da e hakhmat ka Committee.
Da e kti leh ya ka kot kawa da soi da u waheh chnong wa u secretary chnong ka Shnongrim yow khana ya ini waroh.
Kamtæ da kyrpaad ya ka Fact-Finding Committee wow bichaar ya ki kot ki sla, ki sakhi ki sabut wei wow ap leh ya ki liang waphær waphær chwa wow pynmih ya ka Report.
Discussion about this post