Ka Amlarem Sub-Divisional Sports Association (ASSA) da pyntip ko cha waroh wa ka Amlarem Football League 2026-27 u sdang noh ko ha ka 10 tarik uni u October 2026 ha Mini Stadium, Ladjaplem – Amlarem wei ha kani ka sngi sdang daw wan sakhi u MLA ka Amlarem, u Lahkmen Rymbui kam u kongsan, ka SDO (C), ka Vevotulu Kezo wa u BDO, u Dr. D Lyngdoh deilang kiwi ki bru wa bna naam ka thaaiñ.
Ha kani ka sngi ka yalehke u sdang chwa da ka Super League hapyrdi ka Lamin 11 pyrchah ya ka Amlarem SCC ha i por 1:00 waje i sngi wei ya kiwi ki Division ka League daw sdang noh ki chirup deilang.
Da kyrpaad ya ki paidbah ka thaaiñ u sñiawbha wan sakhi ya kani ka lehke ha kani ka sngi khamtam wa ka thaaiñ da yoh ko ya ka Mini Stadium næ u Turf thymme wei u man leh ka League wa kyrpang ha uni u snem kawa leh kam chibynta i lehkmen dap 50 snem ka Amlarem Sub-Division.
Ki yalehke ka 1st Division u sdang ki nadooh ka 12 tarik da ar tylli kawi heipor 1:00 waje i sngi wei kawi won heipor 2:30, ka 2nd Division leh u sdang ko ha ka 12 tarik hi da ar tylli ki yalehke deiwa sdang heipor 9:45 i step wei pynbood won sa ka 11:00 waje i step, ki yalehke ka 3rd Division u sdang ki ha ka 13 tarik deiwa pynman leh tylli ki yalehke nadooh 9:45 i step pynbood sa heipor 11:00 waje wa kawi won heipor 12:30.
Discussion about this post