Ki koidi ka District Prison and Correctional Home, West Jaiñtia Hills wa em ha Jowai daw yoh noh ki ya ka e sikai Skill Training kam chibynta wow yarap ya ki u em ki sap wow yarap pynyoh kreh ki manda lait patok hawa psiah biang ki cha ka imlang sahlang.
Ya ka yalang yow sdang yeini da pynman ynne da ka Bosco Pnar Multipurpose Vocational Training Centre, Jowai deiwa ya krehlang wa ka Meghalaya State Skill Development Society (MSSDS) wa ka CM Skills Mission kawa em hapoh ka Department of Labour, Employment & Skill Development ka sorkar Meghalaya.
Ha kani ka yalang da emlan u Abhinav Kumar Singh, Deputy Commissioner ka West Jaiñtia Hills kam u kongsan, u Union Kyndiah, Superintendent ka District Prison and Correctional Home kam u symbood kongsan deilang wa u Lambormi Suchen, Skill Development Officer, West Jaintia Hills, u Fr. Abialstar Kharsohtun SDB, Principal, Bosco Pnar MVTC wa ki sahep ka District Prison chirup ki heh ka Bosco Pnar.
U Union Kyndiah hawa e yei klam da ong u wa kam kini ki jait sikai toh kiwa emkaam bha heiwa neiliang u Lambormi Suchen won da batai bniah u ya ki jait sikai kiwa daw e.
Neiliang u DC da ong wa u deiwa em kini ki Skill Training daw yarap ko leh ya kiwa chah kset yow tip ki kammon u seiñ dei yong ki hi i kreh manda lait ki, wei da kyntu u ya ki wym toh u pynsepai yeini.
Neiliang ki koidi da e ki da iwi i rwai wei da pynbood da ki kyntien e khublei na u Fr. Abialstar Kharsohtun.
Ki jait e sikai wa daw yoh ki koidi toh ka Computer Basic, Tailoring, Soap Making, Candle Making, House Wiring, Wooden & Bamboo Craft, Food Production & Bakery.
Discussion about this post