Ka yung krehkaam ka District Medical and Health Officer, West Jaiñtia Hills District ynne ka sngi da pynman yalang ko hajrong kammon u yakhun pyrchah yei dih duma kawa tip kam ka World No Tobacco Day hajrong ka phang wa ong “Unmask the Appeal-Countering Nicotine and Tobacco Addiction” ha ka yalang wa da pynman ha Chutwakhu Indoor Hall, Jowai.
Ha kani ka sngi ka Emelya Ch Momin, Assistant Commissioner, West Jaiñtia Hills District da man ko kam ka kongsan heiwa da e kti ko leh ya ka khusnaam sñiawngooh cha ka yung krehkaam u Superintendent of Police, West Jaiñtia Hills Jowai hajrong i bynta wa kongsan yong ki u pynkrehkaam ya ka aiñ COPTA.
Ha kani ka yalang da emlang leh u Additional SP, u Jason Mairom, u OC ka Jowai Police Station, u W. P. Nongtdu, u Sub-Inspector of School Education Officer, u H.C. Lamin, u Advocate, u M. Najiar napoh ka DLSA, u B. Sutnga MVI napoh ka chnat Transport, ki heh napoh ka chnat i chait i khiah, kiwa sikai wa ki khynnah skur na ki phra tylli ki skur ka District.
Ka Emelya Ch. Momin hawa klam ong ko boonsien poi wow sdang i dih i baam duma toh neiwa kwah maad, i chah pynbor ha ki lok næ i kwah wow yatohlang i manlok kawa ye u yah chei kyrni yei myllien wa sih.
Da kyntu ko ya ki khynnah skur wow yaleh pyrchah yei chah pynbor ha ki lok dei wow jied yei chait i khiah. Da pynkynmoo ko leh ye kyntien wa ong, “Be Smart, Don’t Start” iwa mut wow man kitæ kiwa stat deiwa dam u sdang.
Heijooh i por kyntu ko wow ksoh yei smai pyrchah yei pynemkaam duma wa da leh ha kani ka sngi najrong wow rahlang ya kani ka wyrta cha ki manyung, ki lok ki jor wa ka imlang sahlang.
U Additional SP, u Jason Mairom da pynsñiaw u ya ka kyndon aiñ wa khang u dai ya ki duma chajan ki thaw puræ, neitæ da khana u heiyatoh i pyrchang ka chnat pulit u pynkrehkaam ya ki kyndon deiwa lai kynreh wei pynchitom ya kiwa tyngkheiñ aiñ.
U H.C. Lamin, Sub Inspector of School yaroh u yei kitkhia kiwa sikai wa ki khynnah skur hei wow pynman ya ki skur wa lait na u duma, wei kyntu u leh ya kiwa sikai u pteiñ yahluti ya ki khynnah skur cha ka luti i chait i khiah.
Pynkynmoo haroh u ya ki khynnah skur wa i chait i khiah yarap ko leh u ye ki wow pynlai yei bor ha i puræ puthi.
Ka Dr. R. Talang, District Nodal Officer, National Tobacco Control Programme (NTCP), lyngba ka Presentation da e ko i batai hajrong i sih u duma, katwa u Advocate M. Najiar da klam u hajrong ki kyndon ka aiñ Cigarettes and Other Tobacco Products Act (COTPA), 2023.
Ha kani ka sngi da e khusnaam ‘Best Performer Awards’ leh cha ka Jowai Police Station wa Umplong Camp, da saam khusnaam leh cha ki skur wa chimbynta hei yakob lai Rally wa Signature Campaign heiyatoh wa i yakhun pyrchah yei dih duma.
Chwa ini ka Dr. P. Shylla, District Medical and Health Officer da e ko i klam pdiang burom, wei da yoh leh i rwai pdiang na ka Loomkyrwiang Urban Primary Health Centre (UPHC).
Da pynphooh pynphieñ chooh chooh ya kani ka sngi da ka Interactive Session na ki Chi Iung lyngba i rwai, i chaad, i lehke Drama tbian, da em haroh ka Open Quiz wa da chimbynta ki khynnah skur najrong kiwi won.
Discussion about this post