Ka Pnar Student Movement (PSM) Central Body ynne ka sngi hei yahkhmat u President Rangbah ka seiñ, u Embhah Passah wa u General Secretary, u Wompher Wann deilang ki kattu katni ki dkhot, da yachem ki wa u Minister ka Health Department ka sorkar Meghalaya, u Wailadmiki Shylla yow e ar tylli ki dorkhat.
Neiliang ka seiñ da dawa ko wow booh MCH Hospital ha East Jaintia Hills District khnang wow suk ki paidbah wei wow pynheh ya ka MCH Jowai na ka 100 Bedded cha ka 200 Bedded.
Hawa yaklam wa u Health Minister, neliang ka seiñ PSM da pynsñiaw ko yei eh i khoo ki bru na Ri-loom Jaiñtia hei wow phah sumaar cha kani ka Hospital ha Jowai neidaw wa da khynnia ware ko wei kani ka thaw sumaar da chakri ko ya waroh ka Jaiñtia Hills, kat da kamtæ chem chitom ki bru wa dooh wa duk neidaw wa khynnia ware hadooh wa phah lai sumaar cha ki Private Hospital.
Neliang u Wailadmiki da kular u wow chimkhia yeini i kaam wow pynheh ya ka MCH Hospital Jowai neibynta u pynsuk ya ki paidbah ka Ri-loom Jaiñtia waroh kawi wei kamwa man kattæ da em leh ka mang tangka wow pynheh ya kani ka Hospital.
Ka seiñ PSM da kyrpaad joor ko wow pynsmat wow kreh ya kani ka Hospital neibynta wow pynsuk ya ki paidbah neibhah deiwa biang ki Hospital sorkar, ki Doctor wa ki Nurse ha waroh ar tylli ki District pynsuk ko chiboon ya ki paidbah.
Sa kawi ka khubor wa sñiawsuk wa neiliang yong u Health Minister da ong u wa da pait bniah bha u wow yaleh u pynku kyrdan wot ya ki CHC wa em ha ki Sub-Division wa ha ki Block wei heiyatoh wa ka MCH ka wow booh ha East Jaintia Hills dang paitbniah chwa yei thaw weiwa kamwa man kattæ wot ka Civil Hospital wa em ha Khliehriat leh dang em hapyrdi i pynbiang pyntoh wow man ko kam kiwi tawon ki District.
Discussion about this post