U Deputy Commissioner (Supply) ka West Jaiñtia Hills da pyntip u cha waroh kiwa pynemkaam ya ki Domestic Liquefied Petroleum Gas (LPG) hapoh ka District wa emkaam ki wow pyndep klem pep ya ka Biometric Aadhaar Authentication (BAA) yow ye u yoh tadong kum LPG hei dor Retail Selling Price (RSP) deilang ka Subsidy, nadooh ka 1 tarik u October, 2026.
Yeini da phah wow leh katkam wa da kdaw ka Ministry of Petroleum and Natural Gas ka sorkar India wa ka Directorate of Food, Civil Supplies and Consumer Affairs ka Meghalaya ha ka 5 tarik uni u bnai.
Ya kitu ki wym pu em pyndep ya ka BAA da kyntu ya ki wow leh smat yeini yow lait u sahkut i yoh LPG wei yeini ye leh wow leh pyn heipor wa chim ya ka LPG, ye leh u pynemkaam da ki Mobile App ki Oil Marketing Companies (OMC) lane deiwa lai cha ka Showroom kiwa saam LPG.
Kini ki App toh kiwa pyrtuid ka IndianOil ONE neibynta kiwa pynemkaam ya ki LPG ka Indane, ka HelloBPCL neibynta kiwa pynemkaam da ki LPG ka Bharat Gas wa ka HP PAY neibynta kiwa pynemkam da ki LPG ka HP Gas.
Ya kitu kiwa da pyndep ya ka BAA ym emkaam de u leh ki yeini.
Ya kitu kiwa ym pu em ye u leh næ ki wym bien u leh yeini ye ki wow Register ha jar jiar ki OMC yow yoh ki ya ki LPG hei dor yaaw khlem da yoh Subsidy neibynta ki 5kg næ ki 10 kg Cylinder, iwa chong hei em wei ki kyndon.
Ya kitu ki wym pyndep ya ka BAA ye ki wow chah pyndooh LPG wei ya ka Connection ki ye wow pynim biang hadien wa leh ya ka BAA lane deiwa pynbna ki wow hun ki wow yoh LPG katkam i dor wa em ha ki yaaw ki haat khlem Subsidy katkam kiwa da booh ki kyndon.
Da kyntu ya kiwa pynemkaam LPG wow ya krehlang ki wa kiwa saam LPG wei wow pyndep ya ka BAA yow lait u thut i yoh LPG.
Da phah leh ya waroh ki LPG Distributor kiwa krehkaam ha West Jaiñtia Hills District wow pynche paidbah ki heiyatoh wa ini kamjooh wow yarap khamtam ya kitu kiwa sah cha palatsor.
Discussion about this post