Ynne ka sngi ka NPP Jowai Constituency da pynman ko ya ka yalang paidbah ha Madan Wahriong, Mihmyntdu neibynta u kyrtong MP cha ka Election chiteiñ samoi ka Lok Sabha.
Ha ka yalang da emlang u Dy Chief Minister, u Sniawbhalang Dhar chirup u Health Minister, u Wailadmiki Shylla, u MLA ka Raliang u Comingone Ymbon, ka MLA ka Sutnga Saipung ka Santa Mary Shylla, ki MDC ka JHADC wa kiwi kiwi.
U Dr. Nonglait hawa e i klam ha ka yalang da ong u wa ka chnong Mihmyntdu toh kawa da thooh bniah bha u deiwa kynmoo ya u snem 2015 wa pynman ya ka Seminar ka Synod KJP wei nadooh itæ i por da em ko ha mynsien yong oo wei da wyrchaw u ya ka Wah Myntdu wa man ko kam i rta pyrthai yong oo.
Da ong u wa ka Wah Myntdu man ko kawa da naam bha ha Ri-loom Jaiñtia kawa da chakri wow psa um dih ym du ya ka sor Jowai tangwa kiwi ki chnong nadooh na Ialong ter ter chadooh wa poi Lechka heiwa da ye wot wow u pynmih bordiñ wow pyndap yeiwa emkaam kiwa boon ki District ka jylla hadooh wot leh wow ye u dai ya ka bordiñ.
Yeiwa kdaw ya ka Wah Myntdu da kyruiñ u leh yei wan tyrwa ka NPP ya oo wow yakhun ya ka Election chiteiñ samoi neibhah oo kam uwa wan na ka manyung wa duna hei yoh i laa dei kreh chitom da ye u wow poi ha kiwa boon ki kyrdan hadooh wow khut ya oo wow yaleh ya ka Election heiwa da khana u wa da kynjoh ktien u ya kiwa boon ki waheh kamjooh ki seiñ kiwa da ong ki ya oo wa ymtoh u ieh u ya kani ka kabu kamtæ da pynpyrkhat ko ya oo wow kyruiñ u cha ka Wah Myntdu kawa chakri ya ka jaitbru.
U Dr. Nonglait da ong u wa ka thong yong oo toh wow chakri ya ki paidbah nadooh wow pynbha, u pynche wei wow yada ya ki paidbah, u wanrah yei che kamwa man ka Wah Myntdu kawa da wanrah yei che lyngba ka bordiñ.
Da ong u wa kwah bha u wow booddien ya ki mat ka jaitbru, heiwa wot ka Assembly ka jylla da chim ko ya ka Resolution wow rah yei tipmit ya ka ktien Khasi ha ka Eight Schedule heiwa ka sorkar jylla da tipmit ko ya ka kam ka ktien ka jylla iwa ryngkat wa ka ktien English wa Garo wei i kaam wa dang sahteiñ toh ha Delhi, deiwa pynrap wa lada tipmit ya ka ktien Khasi ha Eight Schedule daw ye u puræ bñiah ya ki ktien wa klam hapoh ka jaitbru Ynñiawtrep nadooh i rukom klam ha Jowai, Jalaphet, Ratacherra, Lamin wa wa kiwi.
U Dr. Nonglait da ong u wa lada jied ya oo kam u MP daw ye u wow lai cha Delhi wow klam ha Parliament dei ktien Khasi i wow man i kaam wa sarong ya ka jaitbru Ynñiawtrep wei yeini emkaam u booddien yei wow yoh yei tipmit ya ka.
Da kdaw u leh ya kiwi ki mat nadooh i pynkrehkaam ya ka ILP heiwa waroh ki Party ha Meghalaya da kyrchaan ki wow pynkrehkaam ya ka hapoh ka jylla.
Heijooh i por da kdaw u yei pyrchah wow tih ya u Uranium ha West Khasi Hills weiwa kini ki le tylli ki mat man kiwa emkaam bha ya ka jaitbru wa ka jylla.
Da ong u wa ka sorkar wa yahkhmat ka NPP man ko kawa da chimkhia bha wow kreh neibynta i bha i miat ka jylla.
U Dr. Nonglait da kdaw u wa lada chah jied u toh wow pynkhlan ya ka sorkar ha ka jylla deiwa ong wa ka sorkar NPP nadooh u 2018 da wanrah ko chiboon ki kaam nadooh ka Education Policy, i eh i khor iwa chem kiwa sikai skur heiyatoh wa ka tulop wei ka sorkar da wanrah ko ya ka Structured Pay Framework, da kdaw u leh ya ka State University, Medical College, Engineering College wa kiwi.
Kamtæ da kyntu u wow jied ya u kyrtong ka Party NPP wow man kam u MP khnang wow ye u booddien ya ki kaam wa sahteiñ wa da pdiang da ka sorkar jylla hapoh ka Assembly.
Discussion about this post