I chah klam beiñ hadooh wa kot hi tangwa ki paidbah wa dooh nong lada bakla ki u jied: Sniawbhalang

U Symbood Montri Rangbah ka sorkar jylla, u Sniawbhalang Dhar ha ka yalang wa da pynman ha Mihmyntdu ha ka 22 tarik uni u bnai yow paan kyrchaan neibynta u Dr. DRL Nonglait kam u kyrtong MP ka NPP ha kani ka Election chiteiñ samoi wa daw pynman, da pynsñiaw u leh ya ki kaam wa bha wa da leh ka sorkar ha kylleiñ ki thaw ka jylla wa kamjooh kiwi won ki Project kiwa daw pynkreh, wei da yaroh u leh yei roi i paar hapoh ka 2-Jowai Constituency deiwa ong hawa jied da uwa mihkhmat wa em i kitkhlieh neibynta ki paidbah, yoo chynna leh yei ku i roi i paar.

Hajrong i chah pynbaad ka NPP, u Sniawbhalang ong u ki bru kiwa heh du i ktien toh kiwa khlem kaam, deiwa e nongmuna ya u kchu wa dap um wa u kchu wa thylli, heijooh i por da e nongmuna u leh ya ka Political Party wa synchaar ha KHADC wa hadien wa yoh yei bor krehkaam ko mar dei kylla ymtoh kamwa kular ko ya ki paidbah chwa ka Election.

ADVERTISEMENT

Kamtæ kyntu u ya ki paidbah wow man kiwa stat u pait u bichaar ym wow ngop hi-eh hei pynbiej kiwi kiwa im du hei beiñ sorkar, heiwa lada kreh ka sorkar leh beiñ lada ym kreh ka sorkar leh beiñ, wei ong u lada ngop ki paidbah ha kam kitæ kiwa yahkhmat wym sñiawthooh wot yeiwa pna klam, cheiwon u poi ka ri waka jaitbru, wei kiwa kam kitæ ym em hi leh u biang ki wow man kam kiwa yahkhmat paidbah.

“Nga da man MLA O la 19 snem iwa sih iwa bha da yoo lut O, neitæ i chah klam beiñ leh hawa kot hi, i yoh yaroh leh hawa biang hi, tangwa da rben i snieh O ym pynap de O ya kitæ,” da ong u Sniawbhalang Dhar.

Ki bru wa kwah e daw won ong u chynna ki du yei wym leh ka sorkar yeiwa leh won ka sorkar ym jooh chynna ki.

Yaroh u leh ya ka Ri-loom Jaiñtia deiwa ong wa man ki kiwa em burom em akor wei kiwa tip u burom yeiwa da yah kiwa heh.

Related posts

Yoh uwi wow riñdur yei wan ka ærlangthari ha Khliehtyrchi

October 23, 2026

Hadien wa tyrrah sei yooh ka kari u heh ka BJP ya uwa yah thuk thuk hadooh wa yap

October 23, 2026

“Iyi iyi wa leh kiwa mihkhmat næ ka sorkar toh neibynta ka mynried ki khon ki kti, tangwa lada ki paidbah won ym man ki kiwa pyrkhat jngai hawa jied ya kiwa mihkhmat, i doohnong wa nyngkong toh ya ki hi”.

Ong u leh wa ha oo hi samen ngait u ymtoh u chim ya kawon kawon ka rai wa biang lut, tangwa u chim ya ka rai dei wow pyntoh pynbha neibynta u im ki paidbah.

I roi i paar wa wanrah ka sorkar kamwa man katni pathan toh kawa biang tam ya ka jylla wa ka mynried ki khon ki kti deiwa e nongmuna u ya ka kaam uiñke suwari ha ka jylla hawa ha ka chi sngi ym duna ya 7000 tylli ki kari wa psiah lai uiñke ha jylla Meghalaya wei ha man kawi pa kawi ka kari da em 4-5 ngut wa chong iwa mut 30,000 ngut chi sngi ym duna. Wei lada pynlut ki Rs. 1000 ha Meghalaya pynyoo Rs. 3 klur chi sngi yoh nong ki paidbah ka jylla.

Tangwa yeini leh ong u ym em wa kheiñkor deiwa pyrchah u wan kiwa na baar, wa hei sakhiat kiwa na baar leh emkaam hi u wan ki cha ka jylla deiwa em u pood.

Ong haroh u wa katni ya iwon iwon iwa mut u wanrah yei roi i paar da em bait kiwa pynwit wa kiwa kmen, heiwa da yaroh u yaka Ri-loom Jaiñtia wa boonsien hi toh kawa pdiang yei roi i paar.

Hawa khut kyntu ya ki paidbah ong u ka pyrthai toh kawa khian kawa syuiñ wei emkaam u yatylli para i yow ku ka jaitbru.

Hajrong i jied won ka Party u pynyieñ da u Dr. DRL Nonglait ha kani ka By-Election ong uwa toh wa yoo wa man u u bru wa biang wei uwa yatoh paidbah. Kamtæ da kyntu u leh ya ki paidbah u jied ya u Dr. Nonglait neibhah wa man u u bru wa biang tam wei uwa em ha ka liang synchaar.