Da sdang ya ka East Jaintia Hills Tourist Taxi Driver and Owner Association kawa kamai kari cha Guwahati wa kiwi de ki thaw cha baar

Ka seiñ kamai kari thymme kawa na East Jaiñtia Hills kawa tip kam ka ‘East Jaintia Hills Tourist Taxi Driver and Owner Association’, da sdang ka ynne deiwa wan wai paidbah da u MLA ka Khliehriat, u Kyrmen Shylla ha ka yalang wa da pynman ha Ladsutnga kawa man leh kam ka thaw pynyieñ kari ka Association.

Kani ka seiñ toh kawa em 14 ngut ki dkhot wa 16 tylli ki kari kamai (Tourist Taxi) kiwa lai na Khliehriat cha Guwahati wei kiwa lai Booking leh cha Darjeeling, Sikkim, Kolkata, Arunachal Pradesh, Bihar wa Siliguri.

Da ya emlang ha kani ka sngi wa u President ka Association, u Nikynsaiborme Phawa deilang ki dkhot wa kiwi de.

Neiliang u MLA hawa e yei klam da kyntu u ya kiwa kamai wow man kiwa yaichah neibhah wa em i eh hapyrdi ka Meghalaya wa Assam heijooh i por leh da pyn-eh-daw yow nang heh nang krai wei wow hoi khih hoi khan kamjooh leh yow ku ki kaam uiñke suwari hapoh kani ka thaaiñ.

Da khana u leh yeiwa chem u hawa lai u cha baar heiwa kiwa yah kari da tyrwa ki nadooh ka um hadooh ki Chocolate kam ka dak pdiang sñiawbha, kamtæ da pynchlur u ya ki dkhot ka seiñ yow man ki kiwa em-akor wei kiwa tip u pyrkhat neibynta kiwa lai wa wan wa kit ki.

Neiliang u President ka Association da ong u wa da wanrah ya kani ka seiñ hapyrdi boon i chem chitom kiwa kamai kari ha ka chi snem wa dadep ym du hawa lai cha baar tangwa wot hapoh ka District leh, hanla kattæ leh da pteiñ ki wow kreh chitom hadooh wa ye u wai ya kani ka seiñ.

Da e khublei u leh ya u Waheh Chnong ka Khliehriat West, u Justine Dkhar uwa da e NOC wow chna ya kani ka Association. Da e khublei leh ya u Waheh Chnong ka Dkhiah East, u Pridalin Nongtdu uwa da e NOC yow booh ya ka Stand ha Ladsutnga.

Kiwa emkaam kari ye ki wow Phone ha kini ki Number-6909883599/7628865746.

Kiwa ksohkaam wa ki dkhot ka East Jaintia Hills Tourist Taxi Driver and Owner Association man ki kamni:

Nikynsaiborme Phawa- President

Meaningful Ryngkhlem – Secretary

Lakshman Rymbai – Treasurer

Enjoyfull Dkhar – Adviser

Michas Ryngkhlem – Assistant Secretary

Ki Member

Betweenme Phawa

Arme Dkhar

Leo Dkhar

Plusme Ryngkhlem

Maryoki Kyndait

Peachingme Ryngkhlem

Testme Kyndait

Dressing Dkhar

Emdor Suchiang