Hap kitkhlieh ki pulit lada jia iyi iyi ya uwa siat yap ya 5 ngut ha Guwahati, ong ka yung bichaar

Ka yung bichaar u Chief Judicial Magistrate (CJM) ha Guwahati da hukum ko ya ka Assam Police wow pyntikna wa chngaaiñ u Ghanakanta Gogoi, uwa siat ya ki 6 ngut heiwa da yap 5 ngut ha i miet ka 26 tarik uni u bnai.

Ini wan i hadien wa mih i sñiawkhia yei chngaaiñ u Gogoi heiwa ye wow em ki wow leh tput ya oo wot hadooh i chah lehbeiñ u hawa em u ha kti ki pulit wei ya ini da wanrah da u Lawyer wa yasaaid ya u Gogoi. 

Ka yung bichaar da phah ko leh wow pyndep ya ka Medical Examination man ka 24 kynta wei wow yada bha ya oo khamtam hei miet. 

Da khang leh ya ki pulit wow pynmih ya u Gogoi cha lait nadooh wa sepsngi hadooh wa mihsngi wei manda yah ya oo cha lait wow chim sabut emkaam u emlang u heh pulit wa man kam u Deputy Superintendent of Police (DSP).

Ka yung bichaar da maham ko leh wow bahkhlieh ki pulit lada jia ya u Gogoi katwa em deiwa phah wow bood ya ki kyndon ka Supreme Court katkam ka mukotduma D.K. Basu Versus State of West Bengal.

Related posts

Khut sñiawbha ka St. Mary Mazzarello Girls HS School ya ki khynnah skur warim cha ka lehkmen dap 100 snem

October 28, 2026

Thung ka sorkar ya ka Ripnar Lyngdoh kam ka Chief Information Commissioner

October 28, 2026

U Gogoi uwa 34 snem da chah kem u hadien wa siat u ya ki 6 ngut ha Hotel Bilas Inn ha Lachit Nagar wei da yah ya oo cha yung bichaar u CJM ynnin ka 27 tarik.

I takit ki pulit da chem wa u Gogoi da yania u wa ki tre kani ka Hotel kawa da chim wai u neibynta ka 5 snem deiwa sdang nadooh ka 10-09-25 deiwa su Rs. 1.8 lak kam ka bai wai chi bnai. Tangwa hadien wa da pynlut u wow chna pynmiat ka da mih i ya kajia heiyatoh wa i pynemkaam u ya kani ka thaw.

Kamtæ ha ka 26 tarik da yachem u wa ki tre yow pynbait tangwa chwa wow yoh u yaklam da mih i yamai hadooh wa poi chei siat u ya ki 6 ngut wei da yap 5 ngut.