Ka Khasi-Jaiñtia Students’ Union (KJSU), Guwahati, ha ka 7 tarik uni u bnai da pynman ko ya ka Fresher’s Meet ha Shilpgram, Panjabari, Guwahati, hei sakhi wei wan chimbynta kamwa 600-700 ngut wa kynthup nadooh ki khynroo khyllood, kiwa lai puræ ha ki thaw waphær waphær ka sorbah Guwahati wa kamjooh kiwa khih wa kreh ha Guwahati.
Ha ka yalang yong kani ka sngi, u Goldenstar Suchiang uwa ak phlim wa da bna naam ka jylla Meghalaya da man u kam u kongsan, u Neilkee Mukhim, General Secretary ka JSU-Central Body kam u symbood kongsan chirup i emlang u Dr. R. Nongtdu.
Ya ka Khasi Jaiñtia Students Union, Guwahati da seiñ ha ka 26-01-1976 wei da Register ya ka ha u snem 2001 hapoh ka Meghalaya Societies Registration Act,1983 heiwa kam ka seiñ da yoh ko wow e chakri wei yarap ya ki khon Khasi Jaiñtia wa em ha sorbah Guwahati.
I thmu kani ka yachemlang toh yow pynyajan pynyatipmit para Khasi-Jaiñtia wa puræ næ kreh ha Guwahati nadooh kiwa rim wa kiwa thymme khnang yow ye u wanrah i man paralok wei pynneh yei yatylli.
Ha ka yalang wa pynlai da u Deimaiami Passah wa ka Shabana Wahlang da yoh i rwai maya ri wa tip kam i “Ri Khasi Ri Jaiñtia” iwa man chibynta i rwai wow em i mynsien maya ri, wow tipmit yei tynre wa i yatylli para jaitbru Khasi-Jaiñtia.
U President ka Khasi-Jaiñtia Students’ Union, Guwahati, u Enruki Dkhar hawa klam pdiang da pynsñiaw u i kmen sñiawngooh ya ka sorkar Meghalaya kawa da e kyrchaan ya kani ka yalang wa kamjooh ya waroh kiwa emlang ha kani ka sngi.
U Goldenstar Suchiang hawa klam kam u kongsan da kyntu u ya ki khon khynroo khyllood wow man kiwa minot hei puræ, kiwa em i kitkhlieh wei em ya ka thong wa che hei im. Da ban joor haroh u hajrong i emkaam u pynneh ya ka riti dustur næ i man kyrpang ka jaitbru hanla em ha kawon kawon ka thaw.
Katwa u symbood kongsan, u Neilkee Mukhim won da yaroh u ya ka Union heiyatoh kani ka luti wa bha neibynta u pynyajan hapyrdi ki khynroo khyllood wa lai puræ wa kiwa kreh ha kawi don ka rynsan. Da pynchlur haroh u ya ki khynroo khyllood u yakrehlang ki yow kyntu kynrong yei emyatoh wa skem wei wow em i kitkhlieh neibynta i bha i miat ka jaitbru Khasi-Jaiñtia.
Da pynphooh pynphieñ ya kani ka sngi da i chaad i rwai tynre iwa pynyoo yei mahajon ka riti dustur ki khon Khasi-Jaiñtia.
Ha kani ka sngi ka Union da saam khusnaam wei tipmit haroh ko ya ki bru wa embynta u yarap ya ka imlang sahlang. Wei e yaroh sñiawngooh leh cha kitu wa da yarap e snaam sñiawbha neibynta ki para Khasi-Jaiñtia wa emkaam snam ha ki Hospital waphær waphær.
Discussion about this post