Ki ar ngut ki MDC ka Congress ha JHADC wa kynthup ya u Madonbai Rymbai wa u Rikut Parieñ hawa klam paan kyrchaan neibynta u kyrtong ka Party u Vincent H Pala ha kani ka MP By-Election cha ka Lok Sabha ha ka yalang yalap Election wa da pynman hei janmiet ka 10 tarik uni u bnai ha Ladthadlaboh Jowai, da kdaw wei pynkynmoo ki ya ki kaam wa ka Congress da leh ko hapoh ka ri wa ka jylla, kamjooh leh ki kaam wa u Vincent da leh u ha ki por wa dang man MP u.
U Madonbai hawa e yei klam ngait skem u wa u Vincent H Pala u yoh biang u yei jop neibynta u mihkhmat cha Parliament kamwa oo leh hadien 3 samoi lynter wa yoh man MDC da chah rem noh u chisien wei jop biang ha u snem 2025. Wei dei wow yoh biang u Vincent yei jop daw man i kyrkhu ya ki paidbah.
Hawa pynsñiaw ya ki kaam ka Congress hapoh ka jylla ong haroh u wa du kani hi ka Party wa ye u wanrah yei synchaar khadar wa toh wa biang ya ki paidbah.
Ong u kiwi tawon ki Party khamtam ki Party ri-loom ympoi thong ki cheiwon cheiwon leh wot hawa da ka UDP ka Party ri-loom wa khlan bha kawa jooh em leh ya kiwa yahkhmat wa biang la ha jylla næ ki District leh dang haap ko.
Chooh chooh ong u ki Party ri-loom ym ye ki u pyntyllung yei kaam synchaar khadar deiwa e nongmuna yeiwa jia ha ka jylla Assam ha u snem 1996 wa yoh synchar ka AGP ka Party ri-loom, wot hawa toh ka jylla wa rap ye u pynmih poisa daka yaka hi leh.
Yooluti haroh u wym slem de ya ka chuki Prime Minister leh daw poibiang cha ka Congress heiwa ki paidbah u yoh biang ki yei kyrkhu kamwa ha Parliament katni ka Congress toh kawa heh i boon MP.
Neiliang u Rikut Parieñ hawa klam ong u, ka Congress toh kawa yieñ yow yakhun pynyoh laitlooid ya ka ri na kti ka sorkar pharæng, kawa pynyoh ya ka riti synchaar (Constitution) wei kawa e leh ha ki paidbah yei synchaar laitlooid wei e leh ki hok salonsar ha ki paaid wa chong chnong ka ri.
Katwa ka sorkar NDA wa yahkhmat da ka BJP da pyrchang ko u wanrah ki aiñ waphær waphær kiwa ktah ya ki paidbah, kamtæ kyntu u wa hap pyrkhat bha da uwa kammon uwa mihkhmat u jied neibynta u lai mihkhmat ha Parliament, wei ka Party kawa kammon kawa yieñ laitlooid u yasaaid yei hok ki paidbah.
Hawa pyntikna yei yatoh lok ka NPP waka BJP da pynkynmoo u heiyatoh waka CAB ha Parliament wa neiliang ka MP NPP na Tura da embynta ko u e i kyrchaan, na itæ i daw ong u hap pyrkhat bha lada pynjop ya u kyrtong ka NPP.
Neitæ wow pynjop ya u kyrtong VPP leh ong u hap pyrkhat neibhah toh uwa yieñ ha pyrdi khlem kawon kawon ka liang wei du samen ym ye hi u yasaaid wei yada yei thmu ka BJP.
Deiwa pynkynmoo u ya u MP warim u Dr. Ricky AJ Syngkon uwa da khlaad noh wa wot hawa em u chiboon kiyi kiyi i thmu i pyrkhat tangwa ym yohlaad bha u wow klam wa tbian i por ya oo neidaw wa man u MP wa du samen.
Wei hawa pynkut yei klam khut kyntu u ya ki paidbah wow uiñ biang ki cha ka Congress, deiwa ong leh, “Hao da e sneiñ phi ya ka Party yong i neibhah kam kiwa yahkhmat boi ym ye u lait na iwon iwon i bakla”.
Discussion about this post