Ka South Shillong Advisory Committee da booh FIR ko pyrchah ya ki dkhot ka Joint Action Committee (JAC) wa u Chairman ka Greentech heiyatoh wa iwa jia ha ka 11 tarik uni u bnai ha ka yalang wa da pynman ha State Centre Convention, Shillong.
Ha ka FIR da ong wa ha kani ka yalang wa da khut pynman da ka South Shillong Advisory Committee heiyatoh wa i chna ya ka Shillong Ropeway Project yow yaklam yeiwa sñiawkhia heiyatoh wa ini i kaam khamtam ki tyllong um wei yow poi cha i ya sñiawthooh.
Tangwa da em ki kattu katni ki dkhot ka JAC kiwa da pynthut ya ka yalang deiwa kbai wei pynemkaam da ki kyntien Politics heithaw wow yaklam deiwa booh ki sabut wa man Scientific yow pynskhiat yeiwa kam ki.
Da ong leh wa neiliang u Sanbor Shullai, MLA uwa man kam u Chairman kani ka South Shillong Advisory Committee da tyrwa u wow phah cha ka sorkar yow thung ko da ka Expert Committee wow em da ki bru na ki IIT, ki NIT wa kiwi de ki chlem e sikai ki wow puræ bniah yeini deiwa man laitlooid yow pait leh ya waroh iwa da sñiawkhia ka JAC.
Tangwa da em ki dkhot ka JAC kiwa da kbai, kiwa da pynkulmar hadooh wow khang ya ka luti lai u MLA heiwa da em kiwa tia chajan u wei neiliang u Chiarman ka Greentech da pyrchang u wow taan yabor ya u MLA hadooh wa poi chei ya kajia wa chit ha kani ka thaw.
Da ong leh wa i rukom leh kini ki bru da man ko kam wow pyntieñ wei wow pynthut yei suk i saaiñ heipor wa em kani ka yalang.
Kamtæ ha kani ka FIR kawa da booh ha u SP ka East Khasi Hills da dawa wow pynchitom katkam ka aiñ ya kini ki bru kiwa da pynthut wei tba kti ha kani ka yalang paidbah.
Discussion about this post