Shillong: Ka seiñ Khasi Students’ Union ynne ka sngi kam chi bynta yong ka National Awakening day namo ka sngi kyrsu ri, yong ka seiñ da pynmih ki ya kawi ka sur wow pyrchah yei tih Uranium hapoh ka jylla.
Ha kani ka sngi da pynman ya ka lai paidbah nadooh na madan Urkaliar, Demseiñiong hadooh wa poi hakhmat ka yung krehkaam ka Automic Minieral Directorate (AMD).
Ha ka yalang wa pynman hakhmat kani ka yungkrehkaam AMD da embynta ki dkhot ka KSU, NESO, wa ka Langrin Youth Welfare Association (LYWA).
U president ka LYWA u BS Lyngdoh da ong u wa ka UCIL wa ka sorkar ymyoh tang u yimphoo ki leh wow tih Uranium hapoh jylla neibhah wym em iyi iyi i yohmyntoi ka jaitbru.
Da pynap u leh yei sñiawngooh ya ka KSU kawa da pyrchah yeini nadooh u 1993.
Neiliang u Secretary ka KSU u Donald Thabah da ong u wa ym kwah ka seiñ u yoo ya ka pateiñ wow im ki hei kjut wa boon rukom wei emkaam ya ka jaitbru wa chait wa im, kamtæ ka seiñ u pyrchah bait ko yei tih ya uni u mar pohkhyndaw.
Nalor i pyrchah tih Uranium da yaklam leh wow booh noh ya ki Entry wa Exit Point wow khanglaad yei psiah tooh ki baar jylla, da pyrchah leh yi wan ka rel, kamjooh leh yei man tre chnong ki Hindu na Bangladesh chapoh ri India.
U Daniel Khyriem uwa man leh u President warim ka KSU da ong u wa lada ka AMD wa ka UCIL tih yabor ki ya u Uranium na ka jylla, ka seiñ daw pynyoo ko dei bor wow beh ya ki napoh ka jylla.
U Chairman ka NESO u Samuel Jyrwa da ong u wa kattu la 27 snem wa thmu wow tih Uranium napoh ka jylla wei du nei yatylli ki jaitbru da ye u khang yeini.
Da ong u leh wa ka sorkar da pyrchang ko wow pynbiej ya ki paidbah da ki kaampynroi deiwa chna sarok, wa ka poisa da ki spah klur wow yoh myntoi ki.
“Hanlada u Uranium toh u mar pohkhyndaw uwa kordor wei syad dor, tangwa lada elaad wow tih ya oo daw man ko ka ske ya ka pateiñ wa daw wan” da ong u Jyrwa.
U president ka KSU u Lambokstarwell Marngar da ong u wa ka UCIL hadooh katni da chim ko ya kiwa boon tylli ki mynsien bru neidaw wa pteiñ ko wow siam thlu cha ki chnong wa em Uranium wei ladang pteiñ ki yeini, ki man ki kiwa tynyapbru hapoh ka jylla waroh kawi.
Da ban u deiwa ong wa lada ym sangeh ki yeini ka seiñ daw pynhær noh ko ya ki na bri u Ynñiaw Wasa.
Hadien ini ki dkhot ka KSU da thang ki ya ki dur bula wa chna heidur ka AMD wa ka UCIL kam ka dak wow pyrchah yei thmu kini ki tnat wow tih ya uni u mar pohkhyndaw.
Discussion about this post