Jowai: Ha pyrdi wa joor u slap wa ka la-ær, ki khynnah skur na ki le tylli ki Block ka West Jaiñtia Hills da wan chimbynta chong chit ki ha ka “Jamboree” wa nyngkong wa pynman da ka District Arts & Culture Society deilang wa ki bor district kawa pynman ha Northeast Adventist College, Khliehtyrchi.
Kani ka Jamboree toh kawa le sngi kawa sdang nadooh ynne ka 5 tarik hadooh ka 7 tarik wei ka phang yong ka toh “Igniting Young Minds” namo wow pynkhyrngiat yei pyrkhat pyrdaiñ ki khynroo khyllood. Da wa wan wai ya ka da u DC, u R. Rapthap wei da emlang 120 ngut ki khynnah wa chimbynta.
U DC hei klam yong oo da yaroh u ya u ADM u D.M. Wallang wa hei yahkhmat yong oo da ye u pynman ya kani ka Jamboree wa nyngkong heiwa ki khynnah daw yoh laad ki u yachem lok thymme, u pynyoo yei sap yong ki, u yoh ya ki buit thymme wei da pynchlur u ya ki khynnah wow chim ya kani ka kabu yow yoh ki u chem ya iwa thymme ha kiwa boon jait.
Da ong u leh wa waroh iwa dang tip thymme ki ha kini ki le sngi toh u pynemkaam ki yeiwa bha neibynta ka imlang sahlang.
Ka B. Blah, Block Development Officer, Thadlaskein C& RD Block kawa man leh kam ka programme co-ordinator ha kini ki le sngi, da pyntip ko wa ha kini ki le sngi ki khynnah daw yoh myntoi ki na ki klam yong ki bru chemphang kam na u Dr. S. Syiem, Brian Dali Kharphran wa u Dr. S. Pohsnem.
Daw pynman leh ya ka lai kjat na Khimusniang cha Muphlang, na Lad Japlem cha Kchaaid Krangshuri, wa ki yalehke wa boon jait.
Ka I. Laloo.IAS, SDO Amlarem Civil Sub Division da pyntip ko wa i thong wa kongsan dooh yong kani ka Jamboree toh yow yohlaad ki khynnah u im cha ki thaw kiwa phær na kiwa da myllien ki man ka sngi kamjooh leh yow chlur ki u yachem wa ki lok ki jor wa thymme.
Discussion about this post