Jowai: Ka sorkar u Modi ynnin u snem ha ka 25 tarik u Kmaichonglad ha ka sngi Christmas da pynbna u ya ka kam ka Good Governance Day heiwa da mih i pyrchah na ka sorkar kamjooh leh na ki paidbah.
Ha kani ka kynti won da pynbna u ya ka 14 tarik kam ka Digital India Day kawa man leh ka sngi kyntang ki Kristan kawa tip leh kam ka Good Friday.
Hei yatoh wa ini u Dr. Mukul Sangma da pynsñiaw u yei pyrchah i rai ka sorkar u Modi deiwa ong wa ka sorkar Meghalaya ym chimbynta ko ha kani ka Digital India Day neibhah kiwa boon ki bru hapoh Meghalaya toh ki Kristan wei daw thoh u cha u Modi yow pynsñiaw yei pyrchah ka sorkar kamjooh leh yow paan pynche neiyi i daw jied ki da ki tarik wa kyntang ki Kristan kam ka Christmas wa ka Good Friday.
I pyrchah yei ini i leh ka sorkar u Modi da mih leh na u Conrad K. Sangma, MP ka Tura uwa da thoh chithi cha u Modi deiwa kyntu u ya oo wow burom ya ka sngi Good Friday deiwa kyrriah ya ka tarik yong ka Digital India Day.
U Conrad ha ka chithi da kyntu u leh wow burom kamjooh leh ya kiwi ki niam hapoh ka ri ka neibhah ka India ym toh ka ri wow paitchilliang ya kawon kawon ka niam katkam wa da thoh ha ka Ritisynchaar næ ka Constitution ka ri.
Discussion about this post