Thut i krehkaam ka Heath Dept. ha Jaiñtia Hills neidaw wa thylli ka post CS wa DHMO : WJNC CB

Jowai: Ka seiñ West Jaiñtia National Council (Central Body) hadien wa wan sylli ko ya ka office u DHMO, Jowai, West Jaiñtia Hills da chem ko wa ym em wa ksoh yei kaam CS wa DHMO, wei man ki kiwa thylli neidaw wa da pynku kyrdan ya kiwa jooh kshoh ya kini ki kaam.

Ini i wym em kiwa ksoh ya kini ki ar tylli ki kyrdan da ktah joor ko ya ki paidbah kiwa wan emkaam ha kani ka yung krehkaam.

Neiliang u Publicity Secretary ka seiñ u Hoping Phawa wa ki dkhot ka seiñ da ong ki wa sahteiñ i kaam ki paidbah khamtam kiwa wan na palatchnong wa na sor wa ym ye ki u pyndep ya i kaam wym em kini ki sahep.

Kamtæ ka seiñ lyngba kani ka khubor da kyntu joor ko ya ka sorkar kamjooh leh ya kiwa mihkhmat u thung bru smat ya kini ki kaam wa lait yow suk ki paidbah u pyndep yei kaam yong ki.