Jowai: Ki dkhot wa kitkaam ka Moodymmai hapoh i yahkhmat u Waheh Chnong u Joseph Pariat wa u Chairman ka chnong u Khroosing Passah ynnin ka 26 tarik da hiar ki cha ki thaw rep yong kiwa chong chnong ha Moodymmai iwa em ha Pyntor Sung yow sylli ya i chah thang khiar ki yungsah-bri ha ki damok.
Katkam wa pyntip ki tre da ong ki wa i chah thang kini ki trep da jia i nadooh ka miet yong ka 23 tarik hadooh 25 tarik.
I chah thang kini ki trep da wanrah i chiboon i doohnong ya kini ki warep neibhab ki tiar rep leh da chah baam ki ha ini i diñ nadooh ki symbe, ki kchu ki siang, ki yinnep, wa kiwi kiwi.
Ini i diñ da baam lut i ya ki 11 tylli ki pump kiwa chongdor T. 2,000 kawi wei da em leh le tylli ki kpær jhoor kiwa da chah tympra ha kini ki damok.
Uwi na kiwa rep da pyntip u wa hachwa u jia ini i chah thang da em ki bru kamwa 15-16 ngut ki wym tipmit neidaw wa da tymmoh yei khmat yong ki, kiwa wan chirup wa ki tiar pynmynsoo.
Da pyntip u leh wa kini ki damok da maham tynyap wei da maham tympra ki ya ki kpær yong kiwa rep ha kani ka pynthor.
U Waheh Chnong da pyntip u wa da ujor leh cha ki pulit ka Ummulong Police Outpost wow leh ki yeiwa emkaam.
Ki 9 tylli ki yung wa chah thang toh yong u Brother Synkong, u Omerist Raliang, u Biwen Pariat, u Prisel Sari, u Lammon Syngkon, u Daniel Bhoi, u Dill Laloo, u Richard Siangshai wa u Sifring Suting waroh naka chnong Moodymmai WJHD.
Discussion about this post