Da pynkhai im biang ya ka Chaad Sukra ha Umladkhur

Jowai: Hadien da ki phaw snem pynkhai im biang ka Seng Khihlang Seiñraij Umladkhur kawa haap hapoh ka Amlarem Civil Sub-division ya ka Chaad Sukra, heiwa da yoh u sakhi wa man ko kawa chongchit hanlada man ko ka sien nyngkong wa pynman yaka ynnin ka 7 tarik.

Ya kani ka Chaad Sukra kawa da jooh yatiplang kam ka chaad wa jooh pyndep khlieh u snem daki khon ka niamtre haki Raij ki chnong waphær waphær ka ri-loom Jaiñtia, kam ka dak wow engooh e dem ya ka Bei Rymaw ha chwa wow hiar bet cha ki hali ki pynthor yow miat yow bha i rep i riang.

Kani ka lehkmen toh ka sien wa nyngkong wada pynkhai im biang yaka hadien ki phaw snem wa ka chnong ym em de leh ko ya ka.

Da sdang wow pynkhai im biang toh hadien wa da yaklam pynbait hapoh ka Raij lyngba i kynmoo ki manbei manpa wa haki por nachwa chipoi kini ki por khlieh u snem da pyndep ki ya ka Chaad Pliang deilang i put i tem, kamtæ hajrong ka yurim wow pynneh pynsah yaka dustur riti wa da sikai da u longchwa manchwa da chim ki ya ka rai wow pynkhai im biang deiwa pynman ya kani ka Chaad Sukra.

I pyntip wa emkaam ya ki khon ka Seiñkur Langi

May 11, 2025

Da ki ar tylli ki Drama pynkut ka Chilliangraij ya ka Bamphalar 2025

May 11, 2025

Ha kani ka sngi da wan emlang u MLA ka thaiñ u Stephanson Mukhim uwa da e ki kyntien yaroh yaka Raij wada ye ko u pynkhai im biang ya kani ka chaad kawa man chibynta wow pynneh yaka riti dustur.

Da ong u wa ka ri Ynñiaw Trep toh kawa mahajon bha lyngba ki kaam tynre waphær waphær ha jar jiar i bynta, kamtæ da ong u wa kani ka thaiñ War leh em ko chiboon ki chaad wa da pynneh pynsah kam ka Chaad Rongkhli, Rong Kusi wa kiwi kiwi, neitæ da ong u wa dang em sa kawi ka chaad wa sadu kattu katni donhi ki waheh wa tip yaka, katæ toh ka Chaad “Longhai” katwa kamtæ da kyntu u yaki chnong waphær waphær wow chimkhia ki heiwow pynkhai im biang ki sa ya kani ka chaad.

Kani ka Chaad Sukra ha kani ka sngi man ko kawa chongchit bha han dang man ko ka sien wa nyngkong wa pynman yaka leh, kiwa chong chnong da chim bynta chongchit ki hei chaad waphær waphær.

Hadien wa da pyndep ya waroh i chaad hajrong ha rynsan da yachim bynta yonglang won ki u chaad talawiar ka rynsan wei hadien ini won da mih ki na madan wei da lai chaad ki kylleiñ soodong ka chnong.