Kyntait u Mukul wa phah ksiang u cha ka HNLC wow kyrchaan ya ka Congress

Shillong: Hadien wa mih khubor wa ong wa u Montri Rangbah ka jylla u Dr. Mukul Sangma da paan yarap u na kani ka seiñ HNLC wow kyrchaan ya ka Congress ha ka Election 2018 wow wan, neiliang yong oo da jubab u yeini wa chah pynbaad u.

Da ong u wa ka sorkar jylla da yieñ ko ha ka yurim wa khooid hei yatoh wow pynbait kaam wa ki seiñ kieñ suloi wei ym em murieh ko ya iwon iwon wa pyrchang ko u leh wa ki.

Ka sorkar da chna ko ka laad ya kiwon kiwon ki dkhot kini ki jait seiñ wow mih noh ki na ki seiñ wa emlang ki yow psiah biang ki cha ka imlang sahlang yow wanrah ya i suk i saiñ wa i roi i paar.

Heijooh ipor leh ka sorkar da pynkhlan ko yei bor yong ka wow ye u yaleh wa ki seiñ kieñ suloi wa yaleh pyrchah ya ka sorkar yow yoh ka aiñ u bichaar ya ki.

Related posts

Ka NPP jop ko da ki kaam pynroi, ymtoh da ka poisa: Conrad

November 27, 2024

Ym ye wow tuklar yeiwa takit ha NEHU: Conrad

November 27, 2024

U Dr. Mukul Sangma da ong u leh wa ka Indian National Congress (INC) ym jooh yaklam ko wa ki seiñ kieñ suloi dei bor yong ka hi wei yow wanrah yei suk i saiñ da leh ko katkam ki kyndon kreh kaam wa da booh ha ka bui (Manifesto) ka INC.

Ka INC ka burom ko yei stat ki bru wow jied ya kiwa mihkhmat wa yei chaniah yong ki ha ka wow wanrah ya i roi i paar kamjooh yow pynyoh yei thrang mynsien yong ki samen samen.

U Montri Rangbah da ong u wa ka sorkar daw takit bniah ko ya ka khubor wa phah ka HNLC wei lada chem wa em wa yaklam wei wa yachem wa kani ka seiñ daw pynchitom ko ya ki katkam ka aiñ.

Lada em kiwon kiwon ki dkhot namo kiwa mihkhmat na ki seiñ saiñ hima nadooh ka INC wa kiwi tawon kiwa pyrchang u pynyajooh wei wow krehlang wa ka HNLC, GNLA wa kiwi kiwi ki jait seiñ ka sorkar da pynche ko wa man i iwa pyrchah ya ka aiñ.

Da ong u leh wa lada hei kaam synchaar da yakrehlang wa kiwa boon jait kaam be-aiñ daw ktah joor ko ya ki paidbah waroh ha ka jylla.